জোনাই,১৯ আগষ্ট : ভয়াৱহ বান গৰাখহনীয়াৰ পাছত এইবাৰ প্ৰকৃতিৰ কূপ দৃষ্টি পৰিছে ধেমাজি জিলা সীমান্তৱৰ্তী জোনাইৰ ঐৰামঘাটৰ খেতিয়কৰ ওপৰত ৷ কৃষিকাৰ্য কৰি জীয়াই থকা ঐৰামঘাটৰ প্ৰায় শতাধিক খেতিয়কৰ পথাৰত গছতে গজালি মেলা বহু মাকৈ পচি যায় ৷ একেৰাহে কেবাসপ্তাহ ধৰি অঞ্চলটোত বৰষুণ দি থকাৰ বাবে খেতিয়কসকলে সময়মতে মাকৈ তুলিব নোৱাৰাৰ বাবে গছতে গজালি মেলে মাকৈ,যাৰফলত বহু মাকৈ অনিষ্ট হয় ৷ বহু সংখ্যক মাকৈ গেলীও যায় পথাৰতে ৷ যাৰ বাবে এতিয়া খেতিয়কসকলৰ মাজত সৃষ্টি হৈছে হাহাকাৰ পৰস্থিতিৰ ৷
উল্লেখ্য যে, প্ৰতি বছৰৰ দৰে এই বছৰো খেতিয়কসকলে দুগুণ হাৰত হাজাৰ-হাজাৰ টকা ধাৰলৈ লৈ মাকৈ খেতি কৰিছিল ৷ কিন্তু একেৰাহে বৰষুণ দি থকাৰ বাবে শ-শ বিঘা মাকৈ খেতি অনিষ্ট হোৱাৰ ফলত খেতিয়কসকলৰ লোকচান হয় লাখ-লাখ টকা ৷ কিন্তু ঐৰামঘাটৰ এইসকল দুৰ্ভগীয়া খেতিয়কৰ মাজত দেখা দিয়া এনে দুৰ্যোগৰ সময়ত জোনাই মহকুমা কৃষি বিভাগৰ কোনো বিষয়া-কৰ্মচাৰীয়ে খেতিয়কসকলৰ খবৰ নোলোৱাত ক্ষোভিত হৈ পৰে খেতিয়কসকল ৷
