নিউজ ডেস্ক, 31 অক্টোবৰ: বড়ো কছাৰী স্বায়ত্ত্ব শাসন আৰু অন্যান্য আঠদফীয়া দাবীত জ্বলিছে সমগ্ৰ ৰাজ্য ৷ বিটিচিৰ বৰ্হিঃভূত বড়োসকলৰ উন্নয়নৰ বাবে বৃহস্পতিবাৰে ৰাজ্যৰ কেবাটাও বড়ো সংগঠনে উত্তাল কৰিলে ৰাজ্যৰ ভিন্ন প্ৰান্ত ৷ আগন্তুক বিধানসভাৰ বড়ো কছাৰী উট'নমাচ কাউন্সিল বিল উত্থাপনৰ দাবীৰে আজি প্ৰতিবাদত উত্তাল হৈ পৰিল কামৰূপ জিলাৰ উপায়ুক্ত কাৰ্যালয় ।
আনহাতে ধেমাজীত বড়ো জাতীয় সংগঠনসমূহৰ সহযোগত তিনি ঘন্টীয়া "গণ ধৰ্ণা" কৰে ইউনাইটেড বড়ো পিপুলচ অৰ্গেনাইজেচনে ৷ মূলত বি.টি.এ.ডি.ৰ বাহিৰৰ 21 খন জিলাত বসবাস কৰা 10 লক্ষাধিক বড়ো জনগণৰ বাবে বড়ো কছাৰী স্বায়ত্ব শাষিত পৰিষদ গঠন কৰা আৰু কাৰ্বি আংলং, ডিমা হাচাও জিলাত বসবাস কৰা বড়োসকলক বি.টি.চি. চুক্তিৰ ৮ নং দফা অনুসৰি পাহাৰীয়া মৰ্যদা প্ৰদান কৰা , বন আইন 2006 মতে জনজাতি আৰু পৰম্পৰাগত বনবাসীসকলক ভূমিপট্টনৰ ব্যৱস্থা কৰা আদি দাবীৰ পৰিপ্ৰেক্ষিততে সংগঠনটোৱে এই প্ৰতিবাদী কাৰ্যসূচী ৰূপায়ণ কৰে ৷
সংযুক্ত গণতান্ত্ৰিক মৰ্চাৰ নগাঁও জিলা সমিতিৰ উদ্যোগত লুটুমাৰীৰ বৰপুখুৰী প্ৰাথমিক বিদ্যালয় প্ৰাংগনত স্বায়ত্ত্ব শাসনৰ দাবীত ধৰ্মঘট কাৰ্যসূচী ৰূপায়ন কৰে ৷ ২০১৪ চনৰ পৰাই বিটিচি ৰ বাহিৰত থকা বড়ো লোকসকলৰ বাবে বড়ো কছাৰী স্বায়ত্ত্বশাসিত পৰিষদৰ অন্তৰ্ভুক্তি দাবী উত্থাপন হৈছে যদিও চৰকাৰী পক্ষই এই ক্ষেত্ৰত কোনো গুৰুত্ব দিয়া নাই বুলি মন্তব্য কৰে কেন্দ্ৰীয় সমিতিৰ সম্পাদক যাদৱ বসুমতাৰীয়ে ৷
ৰাজ্যৰ অন্য স্থান সমূহৰ সমান্তৰালকৈ প্ৰতিমুখী হৈ পৰিল মৰিগাঁও জিলা ৷ সহস্ৰাধিক প্ৰতিবাদী কণ্ঠত কঁপি উঠিল মৰিগাঁও উপায়ুক্তৰ কাৰ্যলয়ৰ চৌহদ । ৰাজ্যৰ বিভিন্ন জিলাত বসবাস কৰা বড়োসকলৰ উন্নয়নৰ বাবে বড়ো কছাৰী স্বায়ত্ব পৰিষদ গঠন কৰা, ফৰেষ্ট লেণ্ডত বাসকৰা বড়োসকল ভূমি পট্টা দিয়া, ৰাজ্যৰ আন আন জিলাত বাস কৰা বড়োসকলক জনজাতি মৰ্যদা প্ৰদান কৰা, বড়ো মাধ্যমৰ সুকীয়া শিক্ষা সঞ্চালকালয় গঠন কৰা,বড়ো মাধ্যমৰ বিদ্যালয়সমূহক প্ৰাদেশিকৰণ কৰা আদি আঠদফীয়া এখন স্মাৰকপত্ৰ মুখ্যমন্ত্ৰী লৈ প্ৰেৰণ কৰে প্ৰতিবাদকাৰীয়ে ৷
