দৰং,18মেঃ বোকাৰ পদুম হৈ উজ্বলি উঠিল মঙলদৈৰ ঔতলা অঞ্চলৰ অহকা গাওঁৰ শশাংক ডেকা ৷ অতি দৰিদ্ৰ পৰিয়ালৰ শশাংকই সদ্য ঘোষিত হাইস্কুল শিক্ষান্ত পৰীক্ষাত ঔতলা উচ্চতৰ মাধ্যমিক বিদ্যালয়ৰ পৰা আটাইকেইটা বিষয়ত লেটাৰ নম্বৰসহ 94 শতাংশ নম্বৰৰে উত্তীৰ্ণ হৈছে । সমাজ বিজ্ঞান বিষয়ত শশাংকই লাভ কৰিছে সম্পূৰ্ণ এশ শতাংশ নম্বৰ ৷ চাৰি বিঘা ভূমি থকা কৃষক পিতৃ দয়া ৰাম ডেকাই নিজৰ বাৰীত থকা পাণমুঠিয়েই হৈছে একমাত্ৰ জীৱিকাৰ সম্বল । ওচৰতে থকা সাপ্তাহিক বজাৰত পাণ বিক্ৰী কৰিয়েই পৰিয়ালটো পোহ-পাল আহিছে শশাংকৰ পিতৃয়ে । মাতৃ পূৰৱী ডেকাই ওচৰৰ চুবুৰীয়াৰ ইঘৰ সিঘৰত ভূঁই ৰোৱাৰ লগতে দিন হাজিৰা কৰি কোনো মতে দুই এপইছা উপাৰ্জন কৰিছে । দৰিদ্ৰ পৰিয়ালৰ শশাংকৰ এই উন্নত ফলাফলে গাঁৱখনৰ লগতে সমগ্ৰ অঞ্চলটোলৈ গৌৰৱ কঢ়িয়াই আনিছে ৷
পৰীক্ষাৰ ফলাফলৰ পিছতে অসংখ্য শুভাকাংক্ষীৰে ঘৰখন ভৰি পৰিছিল যদিও শশাংকৰ পিতৃ-মাতৃৰ চকুৰে নিগৰিছিল চকুপানী । দুবেলা দুমুঠি পেটে ভাতে খাবলৈ অসমৰ্থ শশাংকৰ পিতৃ-মাতৃয়ে নিজ পুত্ৰক কি দৰে ভাল শিক্ষানুষ্ঠানত উচ্চ শিক্ষাৰ বাবে পঢ়ুৱাৱ তাকে লৈ চিন্তিত হৈ পৰিছিল৷ কিন্তু মেধাৱী ছাত্ৰ শশাংকৰ উচ্চ শিক্ষাৰ বাবে সহায় কৰিবলৈ আগবাঢ়ি আহিছে বহু কেইজন বিশিষ্ট ব্যক্তি তথা দৰঙৰ বিভিন্ন অনুষ্ঠান-প্ৰতিষ্ঠান । দৰঙৰ আৰক্ষী অধীক্ষক অমিত ভূঞাই আজি বিয়লি শশাংকৰ ঘৰত উপস্থিত হৈ 10 হাজাৰ টকাৰ আৰ্থিক সাহাৰ্য্যৰ লগতে ফুলাম গামোছাৰে সম্বৰ্ধনা জনায় শশাংকক৷ উচ্চতৰ মাধ্যমিকৰ বিজ্ঞান শাখাত পাঠ্যপুথি ক্ৰয়ৰ বাবে এই সাহাৰ্য্য আগবঢ়োৱা বুলি অধীক্ষকজনে জানিবলৈ দিয়ে । কৃতি ছাত্ৰগৰাকীৰ বাসগৃহত আয়োজিত এক অনুষ্ঠানত ঔতলা উচ্চতৰ মাধ্যমিক বিদ্যালয়ৰ অধ্যক্ষ কমল শৰ্মা, সাংবাদিকদ্বয় ভাৰ্গৱ কুমাৰ দাস, মুকুট ৰাজ শৰ্মা উপস্থিত থাকি বক্তব্য আগবঢ়ায় । আনহাতে, শশাংকক উচ্চতৰ মাধ্যমিকৰ দুটা বছৰ বিনামূলীয়াকৈ পঢ়ুৱাৰ দায়িত্ব লৈছে মঙলদৈৰ আগশাৰীৰ শিক্ষানুষ্ঠান ৰঞ্জিত শৰ্মা একাডেমীয়ে ৷
