দৰং, 11 ফেব্ৰুৱাৰীঃ সোমবাৰৰ পৰা ৰাজ্যত আৰম্ভ হৈছে হাইস্কুল শিক্ষান্ত আৰু হাই মাদ্ৰাছা পৰীক্ষা ৷ ৰাজ্যৰ 860 টা পৰীক্ষা কেন্দ্ৰত অনুষ্ঠিত হোৱা মেট্ৰিক পৰীক্ষাত অৱতীৰ্ণ হৈছে ৰাজ্যৰ মুঠ ৩ লাখ ৫৮ হাজাৰ ৪৫৩ গৰাকী পৰীক্ষাৰ্থী ৷
ইয়াৰ মাজতেই দৰং জিলাৰ মঙলদৈৰ এগৰাকী ছাত্ৰীয়ে দৃষ্টি আকৰ্ষণ কৰিবলৈ সক্ষম হৈছে সকলোৰে ৷ জীৱনত যদি আগুৱাই যোৱাৰ মনত প্ৰবল ইচ্ছা শক্তি থাকে তেন্তে কোনো শাৰিৰীক সক্ষমতা অথবা অন্যান্য কাৰণ যে বাধা হ’ব নোৱাৰে তাৰে প্ৰমাণ দাঙি ধৰিলে ছাত্ৰীগৰাকীয়ে ৷
হয়, আমি কৈছো প্ৰফুল্ল নগৰৰ বাসিন্দা কমল বৰাৰ বিশেষ ভাবে সক্ষম জীয়ৰী ৰুণা বৰাৰ কথা ৷ জন্মৰ পৰাই বিশেষ ভাবে সক্ষম ৰুণা ৷ এক জটিল ৰোগত আক্ৰান্ত এইগৰাকী ছাত্ৰী ৷ জীৱন সংগ্ৰামত প্ৰতিদিনে ৰুণাক প্ৰয়োজন হয় 17 টাকৈ টেবলেটৰ ৷ কিন্তু তথাপি হাৰ মনা নাই ৰুণাই ৷ অন্তৰত পুহি ৰাখিছে আগুৱাই যোৱাৰ উদম্য শক্তি ৷
তাৰেই ফলস্বৰূপে এইবাৰ অৱতীৰ্ণ হৈছে সোমবাৰৰ পৰা আৰম্ভ হোৱা হাইস্কুল শিক্ষান্ত পৰীক্ষাত ৷ অৱশ্যে শাৰীৰিক ভাবে দুৰ্বল হোৱা বাবে আঙুলিৰে কলম ধৰিব নোৱাৰে ৰুণাই ৷ সেইবাবে বিদ্যালয়ৰ পৰিদৰ্শকৰ অনুমতি সাপেক্ষে ৰুণাৰ লগত পৰীক্ষা হলত সংগ দিছে অষ্টম মানৰ নিজৰ কনিষ্ঠ ভগ্নী তৃষ্ণামণি বৰাই ৷ ৰুণাই কৈ যায় আৰু উত্তৰ লিখি যায় ভগ্নীয়ে ৷ ৰুণাৰ আশা এইবাৰ পৰীক্ষাত ভাল ফলাফল কৰিবলৈ সক্ষম হ’ব তাই ৷
