মঙলদৈ, 1 ছেপ্তেম্বৰ : বৃহস্পতিবাৰে দৰঙৰ জিলা আয়ুক্তৰ কাৰ্যালয়ৰ সভাকক্ষত জিলা পথ সুৰক্ষা সমিতিৰ এখন সভা অনুষ্ঠিত কৰা হয় । জিলা আয়ুক্ত মুনীন্দ্ৰ নাথ ঙাটেৰ সভাপতিত্বত অনুষ্ঠিত এই সভাত জিলাখনৰ পথ সুৰক্ষা আৰু পথ দুৰ্ঘটনা ৰোধ কৰা সম্পৰ্কে বিস্তৃতভাৱে আলোচনা কৰা হয় । এই সভাত পথ দুৰ্ঘটনা ৰোধ কৰাৰ বাবে যুৱপ্ৰজন্মৰ মাজত সজাগতা সৃষ্টিৰ ওপৰত বিশেষ গুৰুত্ব আৰোপ কৰা হয় ।
জিলা পৰিবহন বিষয়াগৰাকীয়ে ইতিমধ্যে বাটৰ নাট আদিৰ জৰিয়তেও সজাগতা সৃষ্টিৰ বাবে ব্যৱস্থা গ্ৰহণ কৰা হৈছে বুলি সভাত উপস্থিত ৰাইজক অৱগত কৰে । জিলা আয়ুক্তগৰাকীয়ে এই সজাগতা ব্যাপক হাৰত বৃদ্ধিৰ বাবে ব্যৱস্থা গ্ৰহণ কৰিবলৈ নিৰ্দেশ দিয়ে ।
জিলা আয়ুক্ত মুনীন্দ্ৰ নাথ ঙাটেয়ে এই সভাত উপস্থিত থকা ৰাষ্ট্ৰীয় ঘাইপথ প্ৰাধিকৰণৰ প্ৰতিনিধি বিষয়াকেইগৰাকীক জিলাখনৰ মাজেৰে যোৱা ৰাষ্ট্ৰীয় ঘাইপথৰ বিভিন্ন স্থানত হোৱা গাঁতসমূহৰ সমস্যা আঁতৰোৱাৰ বাবে ক্ষীপ্ৰতাৰে ব্যৱস্থা গ্ৰহণ কৰিবলৈ কয় । এই ক্ষেত্ৰত কাম কিছুদূৰ আগবাঢ়িছে যদিও বাকী থকা কামখিনি শীঘ্ৰে সম্পূৰ্ণ কৰাৰ ওপৰত তেওঁ গুৰুত্ব আৰোপ কৰে ।
