দৰং, 13 এপ্ৰিল : মঙলদৈ লোকসভা সমষ্টিৰ বিজেপি প্ৰাৰ্থী দিলীপ শইকীয়াৰ হৈ শনিবাৰে প্ৰচাৰত নামিল মুখ্যমন্ত্ৰী সৰ্বানন্দ সোণোৱাল ৷ সুধাকণ্ঠ ড. ভূপেন হাজৰিকাৰ বিহুগীতেৰে প্ৰচাৰসভাত ভাষণৰ আৰম্ভণি কৰে মুখ্যমন্ত্ৰী সোণোৱালে ৷
শনিবাৰে দৰঙৰ দিপীলাত আয়োজন কৰা হয় মুখ্যমন্ত্ৰীৰ জনসভা ৷ জনসভাত জনতাক উদ্দেশ্যি বিজেপিৰ বিভিন্মুন শিতানৰ কামৰ খতিয়ান ডাঙি ধৰে মুখ্যমন্ত্ৰীগৰাকীয়ে ৷ মঙলদৈ সমষ্টিৰ বিজেপি প্ৰাৰ্থী দিলীপ শইকীয়াক ভোট প্ৰদান কৰিবলৈ জনতাক উদ্দেশ্যি আহ্বান জনায় মুখ্যমন্ত্ৰী সৰ্বানন্দ সোণোৱালে ৷ এই প্ৰচাৰসভাতেই কংগ্ৰেছৰ বিৰুদ্ধে সৰৱ হৈ পৰে মুখ্যমন্ত্ৰী সোণোৱাল৷ স্বাধীনতাৰ 70 টা বছৰৰ পাচতো দেশ তথা ৰাজ্যৰ উন্নয়নৰ বাবে কোনো এটা কামেই কংগ্ৰেছে নকৰিলে বুলি কংগ্ৰেছক ককৰ্থনা কৰে মুখ্যমন্ত্ৰীগৰাকীয়ে৷
কংগ্ৰেছৰ অপশাসনৰ বিপৰীতে মোডীয়ে 5 বছৰতেই দেশৰ নক্সা সলাবলৈ সমৰ্থ হোৱা বুলি জনসভাত মন্তব্য কৰে মুখ্যমন্ত্ৰীগৰাকীয়ে৷ আন্দোলন নকৰাকৈ জনসধাৰণক একো নিদিয়া কংগ্ৰেছে 60 বছৰত মাত্ৰ 6 খন মেডিকেল কলেজ স্থাপন কৰাৰ বিপৰীতে বিজেপিয়ে 2 বছৰ 11 মাহত 4 খন মেডিকেল কলেজ জনসাধাৰণক উপহাৰ দিয়া বুলিও প্ৰকাশ কৰে সোণোৱালে ৷ এই জনসভাতেই বিজেপি প্ৰাৰ্থী দিলীপ শইকীয়াই নিৰ্বাচনত জয়লাভৰ উদ্দেশ্যে মঞ্চৰ মাজতেই জনতাৰ আশীষ বিচাৰি আঁঠু লৈ সেৱা জনাই ৷
