দৰং, 17 মে’: ন্যূনতম সা-সুবিধাৰ মাজেৰেই সফলাক আজুৰি আনিলে দিপীলাৰ এজন মেধাৱী ছাত্ৰই । দৰিদ্ৰতাক প্ৰত্যাহ্বান জনাই মেধাৰ তালিকাত উজলি উঠিছে দৰঙৰ ভেৰুৱাদল গাঁৱৰ বিতোপন শৰ্মা । শেহতীয়াকৈ ঘোষনা হোৱা হাইস্কুল শিক্ষান্ত পৰীক্ষাত ছয়টা বিষয়ত লেটাৰ সহ বিতোপনে লাভ কৰিছে ৮৯ % ৷
পিছে বিতোপনৰ সফলতাত পিতৃ-মাতৃ আনন্দিত যদিও বিতোপনৰ উচ্চ শিক্ষাক লৈ যথেষ্ট চিন্তিত হৈ পৰিছে তেওঁলোক ৷ কাৰণ, বিতোপনৰ দেউতাক এখন ভেন্সাৰ স্কুলৰ শিক্ষক ৷ বিগত বিশ বছৰে বিনা বেতনৰ চাকৰিটোৰে বিতোপনৰ শিক্ষাই নহয় ঘৰখনো চলাব নোৱাৰে তেওঁ ৷ বিনা বেতনে ভেন্সাৰ বিদ্যালয়ত শিক্ষকতা কৰি দিশহাৰা হৈ পৰা বিতোপনৰ পিতৃ গোলোক শৰ্মাই ঘৰে ঘৰে কিতাপ বিক্ৰী কৰি পৰিয়ালটোক পোহপাল দি আহিছে ৷ কিন্তু কিতাপ বেচি গোটোৱা সামান্য টকাখিনিৰে পেটৰ ভোকেই গোচাব নোৱাৰে পৰিয়ালটোৱে ৷ বহুসময়ত লঘোণে থাকিবলগীয়া পৰিস্থিতি হয় বিতোপনৰ ঘৰত ।
অপ্ৰাদেশীকৃত পশ্চিম দৰঙ হাইস্কুলৰ পৰা পৰীক্ষাত অৱতীৰ্ণ হোৱা বিতোপনে ভৱিষ্যতে চিকিৎসক হ’ব বিচাৰে ৷ কিন্তু ভাত সাজৰ কথা চিন্তা কৰিব লগীয়া হোৱা পিতৃয়ে পুত্ৰৰ উচ্চ শিক্ষাৰ খৰচ কেনেকৈ বহন কৰে? ইমানখিনি প্ৰত্যাহ্বানৰ পাচতো ভাল ফলাফল দেখুৱাবলৈ সক্ষম হোৱা বিতোপনৰ ভৱিষ্যতটো ইয়াতে যাতে স্থবিৰ হৈ নপৰে তাৰ বাবে শুভাকাংশীৰ সহায়ৰ হাতৰ অপেক্ষাত বিতোপনৰ অভিভাৱক ৷ সন্তানক সপোন বাস্তৱ হোৱাৰ বাবে আৰ্থিক সাহাৰ্য বিচাৰি কৰযোৰে গোহাঁৰি জনাইছে সদাশয় ব্যক্তি তথা চৰকাৰ লৈ ৷
