দৰং, 30 জুন : সমাগত বিটিচি নিৰ্বাচন সন্দৰ্ভত আক্ৰাছুৰ কেন্দ্ৰীয় সমিতিয়ে সোমবাৰে মঙলদৈ চিলাৰায় ভৱনত এখন সংবাদমেলৰ আয়োজন কৰে ৷ এই সংবাদমেলত উপস্থিত থাকে আক্ৰাছুৰ উপদেষ্টা হিতেশ্বৰ বৰ্মন, সভাপতি কৰমেশ্বৰ ৰায়, যুটীয়া সাধাৰণ সম্পাদক দিব্যজ্যোতি কুমাৰ ডেকা আৰু জীৱেশ ৰায় ৷
সংবাদমেলত উপস্থিত থাকি আক্ৰাছুৰ নেতৃবিন্দই কয় যে, কেন্দ্ৰ আৰু ৰাজ্যৰ শাসনৰ দায়িত্বত থকা বিজেপি নেতৃত্বাধীন চৰকাৰ দুখনে ছয় জনগোষ্ঠীক জনজাতি কৰণৰ নামত আভুৱা ভাৰি আহিছে । 2021 চনৰ বিধানসভা নিৰ্বাচনত কোচ ৰাজবংশী লোকসকল একত্ৰিত হৈ ইয়াৰ উচিত প্ৰত্যুত্তৰ দিব বুলিও হুংকাৰ দিয়ে আক্ৰাছুয়ে । কমতাপুৰ ৰাজ্য আৰু জনজাতিকৰণেই তেওঁলোকৰ মূল ইচ্যু বুলি কৈ এই ক্ষেত্ৰত তেওঁলোকে আপোচ নকৰে অন্যথা আন্দোলন তীব্ৰতৰ কৰিব বুলি সদৰী কৰে ।
বিজেপি নেতৃত্বাধীন চৰকাৰে কোচ ৰাজবংশী সকলক সকলো ফালৰ পৰা আঘাত হানিছে বুলি অভিযোগ আনে আক্ৰাছুয়ে । আক্ৰাছুৱে কম দিনৰ ভিতৰত কোচ ৰাজবংশী সন্মিলন আৰু তেওঁলোকৰ বিভিন্ন সংগঠনৰ এখন যৌথ সভা অনুষ্ঠিত কৰি আগন্তুক নিৰ্বাচন সম্পৰ্কত সিদ্ধান্ত ল'ব বুলি জানিবলৈ দিয়ে ।
লগতে পঢ়ক : দ্বিতীয় দিনা লক ডাউনঃ স্তব্ধ গুৱাহাটী
