দৰং, 12 মে': চৌদিশে মহামাৰী কৰ’ণাই সংহাৰী ৰূপ ধাৰণ কৰাৰ সময়তে মঙলদৈৰ এটি পৰিয়ালে গ্ৰহণ কৰিছে এক প্ৰশংসনীয় পদক্ষেপ ৷ মঙলদৈ চহৰৰ ক'ভিড আক্ৰান্ত লোকসকলক সহায়ৰ উদ্দেশ্যে ওলাই আহিছে পৰিয়ালটো ৷ কৰ'ণাৰ প্ৰাদুৰ্ভাৱে জনজীৱন স্তব্ধ কৰি তোলাৰ সময়তে মঙলদৈৰ সোমা দে হাজৰিকা নামৰ মহিলাগৰাকীৰ লগতে তেখেতৰ পৰিয়ালে ক'ভিড আক্ৰান্ত লোক সকলৰ বাবে বিনামূলীয়াকৈ যোগান ধৰি আহিছে সুস্বাদু আহাৰ ৷
সামাজিক মাধ্যমৰ জৰিয়তে মঙলদৈত ক'ভিড আক্ৰান্ত লোকৰ বাবে সহায়ৰ লগতে ৰোগী সকলৰ বাবে খাদ্য যোগান ধৰাৰ উদ্দেশ্য এটি বাৰ্তা প্ৰেৰণৰ পাচতে মঙলদৈ চহৰৰ বহুকেইটা পৰিয়ালে যোগাযোগ কৰে মহিলাগৰাকীৰ লগত ৷ সেই অনুসৰি নিজ হাতেৰে খাদ্য প্ৰস্তুত কৰি আক্ৰান্তৰ ঘৰৰ পদূলি দি থৈ আহে সুস্বাদু আহাৰৰ টোপোলা ৷
উল্লেখ্য যে, বিগত বছৰটো মহামাৰীৰ সময়ত বহু পৰিয়ালক সহায় কৰিছিল কৰিমচ'কৰ বাসিন্দা স্বামী কংকন হাজৰিকাৰ সহযোগত তেওঁৰ পত্নী সোমা দে হাজৰিকাই ৷ এইবেলিও স্বামী, দুই কন্যা আৰু একমাত্ৰ পুত্ৰৰ সহযোগত সহায়ৰ বাবে পদক্ষেপ গ্ৰহণ কৰাত সকলোৱে শলাগ লৈছে পৰিয়ালটোৰ ৷
লগতে পঢ়ক: যোৰহাটত সাপ্তাহিক বজাৰ বন্ধৰ নিৰ্দেশনা জিলা প্ৰশাসনৰ
