চিৰাং,11 জানুৱাৰীঃ "সুদীৰ্ঘ 19 বছৰৰ পাচত হিতেশ্বৰ বৰ্মণে বিএলটিক সঞ্জিৱ ৰায়ৰ হত্যাকাৰী বুলি সন্দেহ কৰিলে ৷ যদি হিতেশ্বৰ বৰ্মণে জানিছিল যে শ্বহিদ সঞ্জিৱ ৰায়ক বিএল টিয়ে হত্যা কৰিছিল তেতিয়া তেওঁ কিয় থানাত গোচৰ তৰা নাছিল ?" সদৌ কোঁচ ৰাজবংশী ছাত্ৰ সন্থা চমুকৈ আক্ৰাছুৰ কেন্দ্ৰীয় মুখ্য উপদেষ্টা প্ৰদিপ ৰায়ে এই মন্তব্য প্ৰকাশ কৰে৷ শুকুৰবাৰে চিৰাঙৰ চিদলীস্থিত আক্ৰাছুৰ চিদলী আঞ্চলিক কাৰ্যালয়ত অনুষ্ঠিত আক্ৰাছুৰ এখন সংবাদমেলত সংগঠনটোৰ কেন্দ্ৰীয় মুখ্য উপদেষ্টা প্ৰদিপ ৰায় আৰু সাধাৰণ সম্পাদক গোকুল বৰ্মণে সংগঠনটোৰ আন এটা গোটৰ নেতা হিতেশ্বৰ বৰ্মণক কঠোৰ ভাৱে সমালোচনা কৰে৷
এই সংবাদ মেলত সংগঠনটোৰ কেন্দ্ৰীয় মুখ্য উপদেষ্টা প্ৰদিপ ৰায়ে কয় যে 2001 চনত সঞ্জিৱ ৰায়ক গুলীয়াই হত্যা কৰা ঘটনাক তেওঁলোকে তীব্ৰ গৰিহণা দিছিল আৰু সেই সময়ত তেওঁলোকৰ সংগঠনটোৱে হত্যাকাৰীক চিনাক্ত কৰি শাস্তি দিয়াৰ দাবী জনাইছিল ৷ কিন্তু সেই সময়ত প্ৰতক্ষ্যভাৱে কোনো দল সংগঠনলৈ আঙুলি টোৱাই সন্দেহ কৰা হোৱা নাছিল ৷ তেওঁ লগতে প্ৰশ্ন কৰে যে সুদীৰ্ঘ 19 বছৰৰ পাচত এতিয়া কিয় হিতেশ্বৰ বৰ্মণে বিএলটিক সঞ্জিৱ ৰায়ৰ হত্যাকাৰী বুলি সন্দেহ কৰিলে ৷ যদি তেওঁ জানিছিল শ্বহীদ সঞ্জিৱ ৰায়ক বিএলটিয়ে হত্যা কৰিছিল তেতিয়া তেওঁ কিয় থানাত গোচৰ নতৰিলে বুলিও প্ৰদিপ ৰায়ে প্ৰশ্ন কৰে ৷ তদুপৰি সংগঠনটোৰ সাধাৰণ সম্পাদক গোকুল বৰ্মণে হিতেশ্বৰ বৰ্মণক কটাক্ষ কৰি কয় যে হিতেশ্বৰ বৰ্মণে নিৰ্লজ্জভাৱে পাহৰিলেও প্ৰতিজন কোঁচ ৰাজবংশী লোকে জানে যে আক্ৰাছুৰ সভাপতি হোৱাৰ পিচত কাৰ টকাৰে তেওঁ ৰাতিটোৰ ভিতৰত সাৰৰ দোকানীৰ পৰা কোটিপতি হ'ল। হিতেশ্বৰ বৰ্মণে যোৱা বিধানসভা নিৰ্বাচন আৰু বিটিচি নিৰ্বাচনত কাৰ পৰা 5 কোটি টকা লৈছিল যদি সাহস আছে ৰাজহুৱা কৰক বুলি কয় আক্ৰাছুৰ সাধাৰণ সম্পাদক গৰাকীয়ে ৷ লগতে তেওঁ কয় যে যিজন হিতেশ্বৰ বৰ্মণে আজি সঞ্জিৱ ৰায়ৰ হত্যাকাৰী বুলি বিএলটিক দোষাৰোপ কৰি আছে তেওঁ আক্ৰাছুৰ সভাপতি হৈ থাকোতে 2017 চনত নিজৰ গাঁও কালিপুখুৰিত আক্ৰাছুৰ শ্বহীদ দিৱসত হাগ্ৰামা মহিলাৰীক মুখ্য অতিথি হিচাপে আমন্ত্ৰণ কৰিছিল ৷ উল্লেখ্য যে যোৱা লোকসভা নিৰ্বাচনৰ পিচতে আক্ৰাছুৰ মাজত বিভাজন হৈ দুটা গোটৰ সৃষ্টি হয় আৰু সেই দুই গোটৰ মাজত সংঘাত এতিয়া তুংগত উঠিছে ৷ শুকুৰবাৰৰ এই সংবানমেলখন তাৰেই প্ৰমাণ ৷
লগতে পঢ়ক - সমগ্ৰ দেশতে বলৱৎ হ’ল ‘‘CAA’’
