চিৰাং,13 এপ্ৰিল: চিৰাঙৰ বাসুগাঁৱত নাবালিকা ধৰ্ষণৰ অপচেষ্টা কৰি গ্ৰেপ্তাৰ বিবাহিত যুৱক । এগৰাকী ষষ্ঠ শ্ৰেণীৰ ছাত্ৰীক শ্লীলতা হানিৰ অপচেষ্টা কৰাৰ ঘটনা সংঘটিত হৈছে । সম্প্ৰতি আৰক্ষীয়ে অভিযুক্তক আটক কৰিছে । এই ঘটনা সংঘটিত হৈছে বাসুগাঁও চহৰৰ সুভাষ নগৰ এলেকাত ।
আৰক্ষীৰ এক সূত্ৰে জানিবলৈ দিয়া মতে, সোমবাৰে নিশা প্ৰায় আঠ বজাত দোকান এখনত সামগ্ৰী ক্ৰয় কৰিবলৈ ঘৰৰ পৰা ওলাই যোৱা এগৰাকী দহ বছৰীয়া কিশোৰীক এন্ধাৰৰ সুযোগ লৈ পৰিমল মণ্ডল (৩৪) নামৰ বিবাহিত লোকজনে শ্লীলতা হানিৰ চেষ্টা চলায় । ইপিনে সৌভাগ্যৱশতঃ পৰিমল মণ্ডলৰ কবলৰ পৰা নিজকে মুক্ত কৰি কিশোৰীগৰাকী দৌৰি গৈ ঘৰত অভিভাৱকক ঘটনাটোৰ বিষয়ে অৱগত কৰাত সমগ্ৰ কাণ্ডটো পোহৰলৈ আহে ।
তাৰ পিছতে বিপদৰ উমান পাই পৰিমল মণ্ডলে পলায়ন কৰাৰ চেষ্টা কৰে যদিও ৰাইজে কৌশলৰে আটক কৰি উত্তম-মধ্যম শোধায় ৷ স্থানীয় ৰাইজে আৰক্ষীক খবৰ দিয়াৰ পিছতে বাসুগাঁও থানাৰ এটা দল ঘটনাস্থলীত উপস্থিত হৈ অভিযুক্তক আটক কৰি থানালৈ লৈ যায় । সম্প্ৰতি সমগ্ৰ ঘটনা সংক্ৰান্তত কিশোৰী গৰাকীৰ পৰিয়ালে পৰিমল মণ্ডলৰ বিৰুদ্ধে বাসুগাঁও থানাত ৰুজু কৰিছে গোচৰ ।
লগতে পঢ়কঃ কাইলৈ গৰু বিহু
