চিৰাং,27 ফেব্ৰুৱাৰী: চিৰাঙত বৃহস্পতিবাৰৰ পৰা তিনিদিনীয়াকৈ অনুষ্ঠিত হৈছে যুৱ নেতৃত্ব আৰু সমুহীয়া উন্নয়নৰ প্ৰশিক্ষণ শিবিৰ । জিলা সদৰ কাজলগাঁওৰ বড়োলেণ্ড অতিথিশালাত অনুষ্টিত হোৱা এই কৰ্মশালাত চিৰাং জিলাৰ বিভিন্ন প্ৰান্তৰ ৪২ জন যুৱক যুৱতীয়ে অংশগ্ৰহণ কৰে । কেন্দ্ৰীয় চৰকাৰৰ যুৱ বিকাশ আৰু ক্ৰীড়া মন্ত্ৰনালয়ৰ অধীনৰ নেহৰু যুৱ কেন্দ্ৰৰ উদ্যোগত আয়োজিত এই কৰ্মশালাত বিশেষকৈ যুৱক-যুৱতীসকলক সমাজত নেতৃত্ব প্ৰদান তথা চৰকাৰী বিভিন্ন বিভাগৰ আঁচনি আদিৰ বিষয়ে প্ৰশিক্ষণ দিয়াৰ ব্যৱস্থা কৰিছে । অসমৰ বিভিন্ন প্ৰান্তৰ পৰা অহা সমল ব্যক্তিসকলে আহি আৱাসিক এই প্ৰশিক্ষণ শিবিৰত প্ৰশিক্ষণ দিব ।
আজি চিৰাং জিলাৰ অতিৰিক্ত উপায়ুক্ত কৰ্মদেৱ ব্ৰহ্মই আনুষ্ঠানিকভাৱে এই প্ৰশিক্ষণ শিবিৰৰ উদ্বোধন কৰে । ২৭, ২৮ আৰু ২৯ তাৰিখ লৈ চলিবলগীয়া এই প্ৰশিক্ষণ শিবিৰত নেহৰু যুৱ কেন্দ্ৰ চিৰাঙৰ জিলা যুৱ বিষয়া আতোৱাৰ ৰহমান, সাংস্কৃতিক কৰ্মী লক্ষ্মী বসুমতাৰী, নেহৰু যুৱ কেন্দ্ৰ বঙাইগাঁওৰ কামালুদ্দিন বৰভূঞা উপস্থিত থাকে ।
উল্লেখ্য যে, অহা ১১ মাৰ্চৰ পৰা ১৬ মাৰ্চলৈ দেশৰ ৰাজধানী নতুন দিল্লীত কেন্দ্ৰীয় গৃহ মন্ত্ৰনালয় আৰু ক্ৰীড়া তথা যুৱ বিকাশ মন্ত্ৰণালয়ৰ যৌথ উদ্যোগত আয়োজিত উত্তৰ-পূৰ্বাঞ্চল যুৱ সাংস্কৃতিক আদান-প্ৰদান অনুষ্ঠানত চিৰাং জিলাৰ পৰা ৩৩ জন যুৱক-যুৱতী আৰু তিনিজন অনুৰক্ষক (দায়িত্বশীল) বিষয়াই অংশগ্ৰহণ কৰিব বুলি জনাই নেহৰু যুৱকেন্দ্ৰৰ চিৰাঙৰ জিলা যুৱ বিষয়া আতোৱাৰ ৰহমানে ।
লগতে পঢ়ক:6 টাকৈ হত্যাকাণ্ডৰ অভিযুক্ত জলীয়ে কাৰাগাৰত চলালে আত্মহননৰ চেষ্টা
