চিৰাং, 11 জুলাইঃ কেবাদিনৰ পৰা হোৱা ধাৰাষাৰ বৰষুণৰ ফলত চিৰাং জিলাৰ বিভিন্ন নৈ উপনৈৰ বাঢ়নি পানীয়ে ভয়াৱহ ৰূপ ধাৰণ কৰিছে ৷ আই নদীৰ পানীয়ে মথাউৰি চিঙি নিয়াৰ ফলত জিলাখনৰ কেবাটাও অঞ্চল বুৰাই পেলাইছে ৷ বানাক্ৰান্ত ৰাইজৰ খবৰ ল'বলৈ জিলাখনত উপস্থিত হয় অসম চৰকাৰৰ মন্ত্ৰী চন্দন ব্ৰহ্ম ৷ মন্ত্ৰী গৰাকীয়ে পানীৰ মাজেৰে গৈ জিলাখনৰ ওদালগুৰি, ২নং ওদালগুৰি,ছোটো আমগুৰী,সন্যাসীবাৰি, দাউখানগৰ, ছৌৰাবাৰী,ছাৰাপেটা আদি ঠাইৰ বান পৰিস্থিতি পৰ্যবেক্ষণ কৰে ৷ মন্ত্ৰী গৰাকীৰ লগত উপস্থিত থাকে বিজনী সমষ্টিৰ বিধায়ক কমল সিং নাৰ্জাৰী আৰু চিৰং জিলাৰ শীৰ্ষ প্ৰশাসনীয় বিষয়াসকল ৷
মন্ত্ৰী গৰাকীয়ে উল্লেখ কৰা অনুসৰি দ্বিতীয়টো বানত অধিক ক্ষতিগ্ৰস্ত হৈছে ৰাইজ ৷ খেতি নষ্ট হোৱাৰ লগতে পশুধনো আক্ৰান্ত হৈছে এই বানত ৷ সেয়ে কৃষিবিভাগ সক্ৰিয় হোৱাৰ লগতে পশুধনৰো কাইলৈৰ পৰা খাদ্য যোগান দিয়া হ'ব বুলি মন্ত্ৰী ব্ৰহ্মই প্ৰকাশ কৰে ৷
ইপিনে বানাক্ৰান্ত লোকক সঠিক সময়ত এন ডি আৰ এফে উদ্ধাৰ কৰা বাবে বহু লোকৰ জীৱন ৰক্ষা পৰে বুলিও উল্লেখ কৰে মন্ত্ৰী গৰাকীয়ে ৷ বানাক্ৰান্ত সকলক তৎকালীন ভাৱে খাদ্যৰ যোগান ধৰাৰ নিৰ্দেশ দিয়ে মন্ত্ৰী গৰাকীয়ে ৷
আনহাতে বানপৰিস্থিতিৰ সন্দৰ্ভত স্থানীয় লোকে ক্ষোভ প্ৰকাশ কৰি কয় যে নিৰ্বাচনৰ সময়তহে মন্ত্ৰী বিধায়ক সকলৰ তৎপৰতা বৃদ্ধি পায়,তাৰ পিচতে সকলো পাহৰি যায় । স্থায়ীভাৱে অঞ্চটোক আই নদীৰ বানপানী আৰু গৰাখহনীয়াৰ পৰা বিজ্ঞান সন্মত প্ৰদ্ধতিৰে ৰক্ষা কৰাৰ দাবী জনায় স্থানীয় লোকে ।
উল্লেখ্য যে, প্ৰতি বছৰে আই নদীয়ে অঞ্চলটো বানত বুৰাই পেলোৱাৰ লগতে গৰাখহনীয়াৰ সৃষ্টি কৰে ৷ যাৰ ফলত প্ৰতিবছৰে অঞ্চলটোৰ ৰাইজ জুৰুলা হ'বলগীয়া হয় ।
লগতে পঢ়কঃ অন কেমেৰা পথত বাগৰিছে ইখন পাছত সিখন বাহন
