চিৰাং,28 মে': শুকুৰবাৰে চিৰাং জিলাৰ ভাৰত-ভূটান সীমান্তৰ লাইমুতিত এখন দলং উদ্ধোধন কৰে স্থানীয় বিধায়ক জয়ন্ত বসুমতাৰীয়ে ৷ আন ঠাইৰ লগত সংযোগ স্থাপনৰ বাবে যোগাযোগৰ কোনো ব্যৱস্থা নথকা অঞ্চলটোত ইউপিপিএলে পৰিষদ গঠন কৰাৰ পাচতে গুৰুত্ব প্ৰদান কৰি অঞ্চলটোৰ যাতায়াতৰ বাবে বাট-পথৰ লগতে দলং নিৰ্মাণ কৰাত গুৰুত্ব প্ৰদান কৰি প্ৰথমখন দলং নিৰ্মাণ কৰে ৷ এনডিএফবিৰ ঘাটি ৰূপে জনাজাত হোৱা অঞ্চলটোত বিটিআৰৰ পৰা আৱন্টন দিয়া দুই লাখ টকা আৰু ৰাইজৰ অনুদানেৰে দলং নিৰ্মাণ কৰি অঞ্চলটোৰ দীৰ্ঘদিনীয়া সমস্যাৰ সমাধান দিয়ে ৷
উল্লেখ্যে যে, বিধায়ক জয়ন্ত বসুমতাৰীয়ে অঞ্চলটোত শিক্ষানুষ্ঠান গঢ়ি তোলা,যাতায়াত তথা যোগাযোগ আৰু স্বাস্থ্য ব্যৱস্থাৰ বাবে চিকিৎসালয় তথা অন্যান্য উন্নয়নৰ কাম কৰাৰ বাবে ব্যৱস্থা ল'ব বুলিও ৰাইজক প্ৰতিশ্ৰুতি প্ৰদান কৰে ৷ মহামাৰী ক'ভিডৰ এই সময়চোৱাত ছাত্ৰ-ছাত্ৰীসকলৰ বাবে অনলাইন পাঠদান ব্যৱস্থা গ্ৰহণ কৰা হৈছে যদিও বৃহত্তৰ অঞ্চলটোত নেটৱৰ্ক নথকাত ছাত্ৰ-ছাত্ৰীয়ে পাঠ গ্ৰহণৰ পৰা বঞ্চিত হ'বলগীয়া হৈছে । গতিকে অঞ্চলটোত অতি শীঘ্ৰে ম'বাইল টাৱাৰ স্থাপনৰ ক্ষেত্ৰতো গুৰুত্ব দিয়া হ'ব বুলি বিধায়কজনে উল্লেখ কৰে ৷
ইফালে,বিটিআৰ বন বিভাগৰ কাৰ্যবাহী সদস্য ৰঞ্জিত বসুমতাৰীয়ে পৰেশ বৰুৱা আহিলে অসমত উন্নয়ণমূলক কাম কৰিব পাৰিব বুলি উল্লেখ কৰে ৷ কাৰ্যবাহী সদস্যগৰাকীয়ে এনএলএফবি সন্দৰ্ভত কয় যে, এই বিষয়টো অলপ সুকীয়া । আৱেগিকভাৱে কাৰোবাৰ উচটনিত এনএলএফবি গঠন হৈছিল । কিন্তু এতিয়া তেওঁলোক অনুতপ্ত হৈছে,যি উদ্দেশ্যেৰে তেওঁলোকে এনএলএফবি গঠন কৰিছিল তেওঁলোক সফল নহ'ল ৷ মোৰ বিশ্বাস আমি আকৌ মৰমৰ এনাজৰিৰে বান্ধি ৰাখি সকলোৱে একগোট হৈ আগবাঢ়ি যাব পাৰিম ।
লগতে পঢ়ক: নগাঁৱত ড্ৰাগছ মাফিয়া আৰু আৰক্ষীৰ গুলীয়াগুলি
