চিৰাং, 27 আগষ্ট: বিটিচিৰ চাৰিওখন জিলাত হত্যা, হিংসাৰ প্ৰতিবাদত বৃহস্পতিবাৰে আমছুৰ দুঘন্টীয়া অৱস্থান ধৰ্মঘট কাৰ্যসূচী । প্ৰতিবাৰেই নিৰ্বাচনৰ আগে আগে বিটিচিৰ সংখ্যালঘু লোকক টাৰ্গেট কৰি হত্যাযজ্ঞ চলোৱা হয় । সংখ্যালঘু লোকক বলিৰ পঠা সজোৱা হয় । শেষতীয়াকৈ ইতিমধ্যে চাৰিজনকৈ লোকক হত্যা কৰা হ’ল । কিন্তু কোনো এজন হত্যাকাৰী গ্ৰেপ্তাৰ নহ’ল । হত্যাৰ বলি পৰিয়ালসমূহৰ কি দৰে জীৱন অতিবাহিত কৰিছে তাৰো কোনো খবৰ নললে চৰকাৰ প্ৰশাসনে । আনকি কোনো ক্ষতিপূৰণ আদায় নিদিলে চৰকাৰে ।
বুধবাৰেও পৰ্বতঝোৰাত এজনি যুৱতীক হত্যা কৰা হয় । গতিকে কিমান দিন এই ধৰণৰ হত্যাযজ্ঞ চলিব বিটিচিত । সেয়ে বিটিচিত এই হত্যা বন্ধ কৰি সংখ্যালঘু লোকৰ জীৱন আৰু নিৰাপত্তা সুনিশ্চিত কৰা,হত্যাৰ বলি পৰিয়ালক দহ লাখ টকাৰ এককালিন ক্ষতিপূৰণ দিয়া, সংখ্যালঘু বসতি অঞ্চলত নিৰাপত্তা কটকটীয়া কৰাৰ দাবীত বৃহস্পতিবাৰে চিৰাং জিলাৰ হাতীপোতা আঞ্চলিক আমছুৰ কাৰ্যালয়ত দুঘন্টীয়া প্ৰতিবাদী অৱস্থান ধৰ্মঘট কাৰ্যসূচি ৰূপায়ন কৰে । একে দৰে বিজনীতো বিজনী জিলা আমছুয়ে প্ৰতিবাদী কাৰ্যসূচী ৰূপায়ন কৰে ।
উল্লেখ্য যে, বিটিচিত সংখ্যালঘু লোকক হত্যা কৰা ঘটনা নতুন নহয় । ১৯৯৩ চনৰ পৰা আৰম্ভ কৰি ১৯৯৬, ২০১২,২০১৪ চনতো সংখ্যালঘু লোকক ধাৰাবাহিক ভাৱে হত্যা কৰা হৈছিল । এই সমূহৰ কোনো উপযুক্ত বিচাৰ নহ’ল । এতিয়া পুনৰ নতুনকৈ হত্যা যজ্ঞ আৰম্ভ কৰা পৰিলক্ষিত হৈছে । গতিকে আমছুয়ে অতি শীঘ্ৰে এই হত্যা বন্ধৰ দাবী জনাইছে ৷
