মৰাণ, ১১ এপ্ৰিল : ৰাজ্যত অব্যাহত নিষিদ্ধ ঘোষিত সংগঠন আলফা স্বাধীনত যোগদান প্ৰক্ৰিয়া । ইজনৰ পাছত সিজনকৈ যুৱকে যোগদান কৰিছে আলফা স্বাধীনত (Youth from Assam joins in Ulfa I)। বহু যুৱতীও পৰেশপন্থী শিৱিৰলৈ ৰাওনা হোৱাৰ তথ্য পোৱা গৈছে । এইবাৰ আলফা (স্বাঃ)ত যোগদান কৰিবলৈ ঢাপলি মেলিছে মহিলা ।
স্বামী-সন্তান এৰি আলফা স্বাধীনত যোগদান কৰিবলৈ আহি দেওবাৰে আটক হ'ল এগৰাকী বিবাহিত মহিলা । অসম-নাগালেণ্ড সীমান্তৰ নামতোলাত চৰাইদেউ আৰক্ষীয়ে আটক কৰে নগাঁও জিলাৰ মালবিকা বৰা চৌধুৰী ওৰফে মল্লিকা বেগম নামৰ বিবাহিতা মহিলাগৰাকীক(Charaideu Police Arrest woman for joining Ulfa) ।
নগাঁও আৰক্ষীৰ পৰা পোৱা তথ্য অনুসৰি চৰাইদেউ আৰক্ষীয়ে অভিযান চলাই আটক কৰিবলৈ সক্ষম হয় মালবিকা বৰা চৌধুৰী ওৰফে মল্লিকা বেগমক । আৰক্ষীৰ সূত্ৰে জানিব পৰা মতে আলফা স্বাধীনৰ সদস্য অভিজিৎ অসমৰ নেতৃত্বত নিষিদ্ধ ঘোষিত সংগঠনটোত অব্যাহত আছে সদস্য ভৰ্তি অভিযান ।
বৰ্তমান মহিলাগৰাকীক জেৰা অব্যাহত ৰাখিছে আৰক্ষীয়ে । মহিলাগৰাকীয়ে সংগঠনটোত কাৰ জৰিয়তে যোগদান কৰিবলৈ আহিছিল আৰু কাৰ ওচৰলৈ যাত্ৰা কৰিছিল সেই সন্দৰ্ভত সোধাপোছা অব্যাহত ৰাখিছে বুলি মন্তব্য কৰে চৰাইদেউ আৰক্ষী অধীক্ষকগৰাকীয়ে ।
লগতে পঢ়ক: আজি কাব্যঋষি নীলমণি ফুকনলৈ আগবঢ়োৱা হ’ব জ্ঞানপীঠ বঁটা
