নিউজ ডেস্ক, 16 জুলাইঃ দেশৰ উচ্চতম ন্যায়ালয়ে কেন্দ্ৰীয় চৰকাৰলৈ এক পত্ৰযোগে বৈদেশিক ন্যায়াধীকৰণ সংশোধনী নিৰ্দেশ 2019ৰ সাংবিধানিক বৈধতাৰ ওপৰত স্পষ্টীকৰণ বিছাৰে ৷ চলিত বৰ্ষৰ মে মাহত সংশোধনী হোৱা এই নিৰ্দেশ অনুসৰি ৰাষ্ট্ৰীয় নাগৰিকপঞ্জীত নাম অন্তৰ্ভূক্তি আৰু অন্তৰ্ভূক্তি নোহোৱা ব্যক্তিৰ আবেদন প্ৰক্ৰিয়া অন্তৰ্ভূক্ত আছিল ৷
লোকসভাত কেন্দ্ৰীয় গৃহ ৰাজ্যিক মন্ত্ৰী জি কিশান ৰেড্ডীয়ে প্ৰকাশ কৰা তথ্য অনুসৰি, অসমৰ বৈদেশিক ন্যায়াধীকৰণে চলিত বৰ্ষৰ মাৰ্চ মাহলৈ 1.17 লাখ লোকক বিদেশী ঘোষণা কৰিছে ৷ বৰ্তমান সময়ত অসমৰ বিভিন্ন জিলাত সৰ্বমুঠ 100 খন বৈদেশিক ন্যায়াধীকৰণ আছে আৰু 2019চনৰ মাৰ্চ মাহৰ 31 তাৰিখলৈ ন্যায়াধীকৰণে 1,17,164 গৰাকী লোকক বিদেশী ঘোষণা কৰা হৈছে ৷
