নিউজ ডেস্ক, 4 জুলাইঃ যিটো সময়ত ছয় জনগোষ্ঠীৰ জনজাতিকৰণ প্ৰক্ৰিয়াই গতি লাভ কৰিছিল সেই সময়তে কেন্দ্ৰীয় জনজাতি পৰিক্ৰমা মন্ত্ৰী অৰ্জুন মুণ্ডাৰ বিভ্ৰান্তিকৰ মন্তব্যক লৈ উত্তাল প্ৰতিবাদ সাব্যস্ত হয় সমগ্ৰ ৰাজ্যত ৷ নিৰ্বাচনৰ পূৰ্বে ৰাষ্ট্ৰীয় নেতা ৰাজনাথ সিঙৰ অধ্যক্ষতাত অসম চৰকাৰৰ মন্ত্ৰী হিমন্ত বিশ্ব শৰ্মাক লৈ গঠিত সমিতিখনে কেৱল মাথো নিৰ্বাচনী বৈতৰণী পাৰ হোৱাৰহে এক চক্ৰান্ত আছিল বুলি অভিযোগ কৰে টাই আহোম ছাত্ৰ সন্থাই ৷
সংগঠনটোৱে অসমৰ ছয় জনগোষ্ঠী জনজাতিকৰণ নীতিৰ ভিতৰত নপৰে বুলি কৰা মন্তব্য তাচ্ছিল্যসূচক বুলি কোৱাৰ লগতে আৰু ইয়াৰ বাবে বিজেপিৰ বিৰুদ্ধে তীব্ৰ আন্দোলন গঢ়ি তোলাৰ সকীয়নি প্ৰদান কৰে ছাত্ৰ সংগঠনটোৱে ৷ ইয়াৰ বিৰুদ্ধে বৃহস্পতিবাৰে ৰাজ্যজুৰি প্ৰতিবাদ সাব্যস্ত কৰে ছাত্ৰ সংগঠনটোৱে ৷ অসমৰ বিভিন্ন স্থানকে ধৰি যোৰহাট, গোলাঘাট আৰু সৰুপথাৰত প্ৰতিবাদী সমদল বাহিৰ কৰাৰ লগতে কেন্দ্ৰীয় জনজাতি পৰিক্ৰমা মন্ত্ৰী অৰ্জুন মুণ্ডাৰ প্ৰতিকৃতি দাহ কৰে ছাত্ৰ সংগঠনটোৱে ৷
