নগাঁও, 13 মাৰ্চঃ মঙলবাৰে মাজনিশা গুৱাহাটীৰ হোটেল ৰেডিচেন ব্লুত অগপ আৰু বিজেপি ৰুদ্ধদ্বাৰ বৈঠকৰ অন্তত দুয়োটা দলে আগন্তুক নিৰ্বাচনত একেলগে নিৰ্বাচনত অৱতীৰ্ণ হোৱাৰ সংকল্প গ্ৰহণ কৰে ৷ বিজেপিৰ ৰাষ্ট্ৰীয় সভাপতি ৰাম মাধৱে সংবাদ মাধ্যমৰ আগত প্ৰকাশ কৰা অনুসৰি দুয়োটা দলে কংগ্ৰেছক পৰাজিত কৰাৰ স্বাৰ্থত নিৰ্বাচনী যুঁজত অৱতীৰ্ণ হ’ব ৷ ইফালে , অগপ সভাপতি অতুল বৰাৰো মন্তব্য কংগ্ৰেছক পৰাভূত কৰাৰ স্বাৰ্থতে পুনৰবাৰ মিত্ৰজোঁটত চামিল অগপ ৷
ইফালে , মঙলবাৰে অগপ আৰু বিজেপিৰ মিত্ৰতাৰ প্ৰসংগ সম্পৰ্কত প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই কয় অন্য দলৰ সৈতে মিত্ৰতা সন্দৰ্ভত আলোচনা হোৱাৰ পূৰ্বে দলৰ সাধাৰণ পৰিষদৰ সভাত আলোচনা কৰাৰ প্ৰয়োজন ৷ কিন্তু অগপ দলৰ সাধাৰণ পৰিষদৰ সভাত কোনো আলোচনা নোহোৱাকৈয়ে মঙলবাৰে পুনৰ বিজেপিৰে মিত্ৰতা গঢ়ি উঠাক লৈ দলৰ আভ্যন্তৰ আৰু তৃণমূল কৰ্মীৰ মাজত যে বিদ্ৰোহৰ সূত্ৰপাত নহ’ব তাক নুই কৰিব নোৱাৰি ৷ আনহাতে, ইটিভি ভাৰতক জনোৱা অনুসৰি, অগপ-বিজেপিৰ মিত্ৰতা সন্দৰ্ভত মঙলবাৰৰ আলোচনা সম্পৰ্কেও অৱগত নহয় প্ৰাক্তন মুখ্যমন্ত্ৰীগৰাকী ৷ প্ৰফুল্ল কুমাৰ মহন্তই নাগৰিকত্ব সংশোধনী বিধেয়ক সন্দৰ্ভত নিজৰ বিৰোধিতা পুনৰবাৰ স্পষ্ট কৰাৰ লগতে এই বিধেয়কে ত্ৰিপুৰী সকলৰ দৰে অসমীয়াকো এদিন সংখ্যালঘুত পৰিণত কৰিব বুলি উল্লেখ কৰে ৷
উল্লেখ্য যে, প্ৰফুল্ল কুমাৰ মহন্তই ৰাজ্যপাল হ’ব বিচৰাটো এটা অপপ্ৰচাৰ , আনকি মহন্ত পত্নী জয়শ্ৰী গোস্বামী মহন্তয়ো কোনো প্ৰাৰ্থিত্ব বিচৰা নাই বুলি কোৱাৰ লগতে প্ৰতিটো নিৰ্বাচনৰ পূৰ্বেই এইধৰণৰ অপপ্ৰচাৰ হয় বুলি উল্লেখ কৰে প্ৰফুল্ল মহন্তই ৷
