গুৱাহাটী, 7 এপ্ৰিল : সমাগত লোকসভা নিৰ্বাচনক লৈ কামৰূপ মহানগৰ জিলাৰ সভাকক্ষত নিৰ্বাচনৰ বাবে গঠন কৰা বিভিন্ন গোটসমূহৰ নডেল বিষয়াসকলৰ পৰা কাম কাজৰ বুজ লয় ৭ নং গুৱাহাটী লোকসভা সমষ্টিৰ পৰ্যবেক্ষক ধনঞ্জয় ৰেড্ডীয়ে ৷ এই বৈঠকত পৰ্যবেক্ষকগৰকীয়ে আদৰ্শ আচৰণ বিধি, নিৰ্বাচনী ব্যয় কোষ, ফ্লায়িং স্কোৱাড, ষ্টেটিক চাৰ্ভিলেঞ্চ টীমৰ লগতে প্ৰশাসনে গঠন কৰা কোষ সমূহক নিয়াৰিকৈ কাম সম্পন্ন কৰিবলৈ নিৰ্দেশ দিয়ে ।
ইয়াৰ ওপৰি কোনোৱে যাতে নিৰ্বাচনী আচৰণ বিধি উলংঘা কৰিব নোৱাৰে তাৰ বাবে চোকা দৃষ্টি ৰাখিবলৈও কঠোৰ নিৰ্দেশনা প্ৰদান কৰে সাধাৰণ পৰ্যবেক্ষক গৰাকীয়ে ৷ এই বৈঠকত উপস্থিত থাকে কামৰূপ মহানগৰ জিলাৰ জিলা উন্নয়ন আয়ুক্ত ড০ বিজয়া চৌধুৰী, জিলা পৰিষদৰ মুখ্য কাৰ্যবাহী বিষয়া কৃষ্ণা বৰুৱা, অতিৰিক্ত উপায়ুক্তসকল, চক্ৰ বিষয়া, সহকাৰী আয়ুক্তসকল ।
উল্লেখযোগ্য যে, এই বৈঠকতে নিৰ্বাচনৰ বিভিন্ন ওজৰ আপত্তিৰ বাবে ৰাজনৈতিক দল, প্ৰাৰ্থী অথবা ৰাইজৰ বাবে বিশেষ হেল্পলাইন নম্বৰ মুকলি কৰে জিলা প্ৰশাসনে । ৬০০২৬৭৭১৮৪ আৰু ০৩৬১ ২৭৩০৪৮৫ নম্বৰ যোগে গুৱাহাটী লোকসভা সমষ্টিৰ সাধাৰণ পৰ্যবেক্ষক গৰাকীক ওজৰ আপত্তি জনাব পাৰিব সকলোৱে ।
