দলং নিৰ্মাণৰ বিৰোধিতাৰে স্মাৰকপত্ৰ প্ৰদান শিলচৰত

শনিবাৰে দলং নিৰ্মাণৰ বিৰোধিতাৰে উপায়ুক্তক স্মাৰকপত্ৰ প্ৰদান কৰা হয় শিলচৰত ৷ অন্নপূৰ্ণাঘাটত বৰাক নৈৰ ওপৰত প্ৰস্তাৱিত দলং নিৰ্মাণৰ সিদ্ধান্ত লৈছিল জিলা প্ৰশাসনে ৷ সম্প্ৰতি উক্ত সিদ্ধান্তৰ বিৰোধিতা কৰিছে স্থানীয় ৰাইজে ৷

শিলচৰ,18 জানুৱাৰীঃ কাছাৰ জিলাৰ শিলচৰ চহৰৰ লগত সংলগ্ন হৈ আছে এক বৃহৎ অঞ্চল ৷ জিলাখনৰ দুধপাতিল,বদৰপুৰ,মাছিমপুৰ,খৰিল,ডলু,ৰামপুৰ,হাতিছৰা আদি বৃহত্তৰ অঞ্চলসমূহ সংলগ্ন হৈ আছে শিলচৰৰ লগত ৷ কেইবাখনো গাওঁ সংযোগী অন্নপূৰ্ণাঘাটত বৰাক নৈৰ ওপৰত প্ৰস্তাৱিত দলং নিৰ্মাণৰ সিদ্ধান্ত লৈছিল জিলা প্ৰশাসনে ৷ সম্প্ৰতি উক্ত সিদ্ধান্তৰ বিৰোধিতা কৰিছে স্থানীয় ৰাইজে ৷

বিষয়টো সন্দৰ্ভত শনিবাৰে কাছাৰৰ উপায়ুক্ত বৰ্ণালী শৰ্মাক সাক্ষাৎ কৰি এখন স্মাৰকপত্ৰ প্ৰদান কৰে অঞ্চলটোৰ স্থানীয় ৰাইজে ৷ প্ৰস্তাৱিত দলংখন নিৰ্মাণ হ’লে শিলচৰৰ চৈতন্য নগৰ,স্বামীজী ৰোডৰ দীৰ্ঘদিনৰ পৰা বাস কৰি অহা কেইবাটাও পৰিয়াল উচ্ছেদ হ’ব ৷ ইতিমধ্যে উক্ত প্ৰসংগত উচ্ছেদ কৰিবলৈ প্ৰশাসনে পৰিয়ালকেইটালৈ জাননী প্ৰেৰণ কৰিছে । দলংখন নিৰ্মাণৰ ফলত বহুসংখ্যক লোক অসুবিধাৰ সন্মুখীন হোৱাৰ লগতে চহৰখনত তীব্ৰ যান-জঁট সৃষ্টি হ’ব ৷ সেয়ে উক্ত অঞ্চলত দলংখন নিৰ্মাণ নকৰি অন্য ঠাইত নিৰ্মাণ কৰিবলৈ স্থানীয় ৰাইজে প্ৰশাসনক অনুৰোধ জনায় ৷

লগতে চাওকঃ স্বতন্ত্ৰ ৰাজ্যিক মন্ত্ৰী ৰূপে শপত ল'লে যোগেন মহন - সঞ্জয় কিষাণে