শিলচৰ,10 জুন : এক গোপন সূত্ৰৰ পম খেদি বুধবাৰে কাছাৰ জিলাৰ অন্তৰ্গত সোণাই আৰক্ষী চকীৰ ভাৰপ্ৰাপ্ত বিষয়া মনোজ ৰাজবংশীৰ নেতৃত্বত আৰক্ষীৰ এটা দলে ধলাইৰ কাবুগঞ্জৰ তজমুল হুছেইন লস্কৰ নামৰ এজন ব্যক্তিৰ ঘৰত অভিযান চলাই প্ৰায় ২৫০ বস্তা বাৰ্মিজ চুপাৰী জব্দ কৰিবলৈ সক্ষম হয় ৷
এই অভিযানত আৰক্ষীয়ে আটক কৰিবলৈ সক্ষম হয় তজমুল হুছেইন লস্কৰ আৰু নাজমুল হুছেইন লস্কৰ নামৰ দুই চুপাৰী মাফিয়াক ৷ জানিব পৰা মতে, এই দুই চুপাৰী মাফিয়াই নিজ ঘৰৰ চৌহদৰ ভিতৰতে থকা এটা গুদামত MZ O6A 0623 আৰু MZ 02 A 0211 নম্বৰৰ দুখন ট্ৰাকৰ পৰা চুপাৰী আনলোড কৰাৰ সময়ত আৰক্ষীয়ে হাতে-লোটে চুপাৰীসহ দুয়োকে আটক কৰে ৷
বৰ্তমানলৈকে আৰক্ষীৰ এই সন্দৰ্ভত আৰক্ষীৰ তালাচী অভিযান অব্যাহত আছে ৷ ইফালে জব্দ হোৱা চুপাৰীখিনিৰ বজাৰমূল্য প্ৰায় এক কোটি পঞ্চাশ লাখ টকা হ’ব বুলি আৰক্ষীয়ে জানিবলৈ দিছে ৷
লগতে পঢ়ক : গুৱাহাটী মহানগৰীত চাঞ্চল্যকৰ অপহৰণৰ ঘটনা
