শিলচৰ , 03 জুন : স্বাধীনতাৰ 72 বছৰৰ পাচতো উন্নয়নৰ মুখ নেদেখা এখন গাঁও ৷ এই গাঁওখন হৈছে কাছাৰ জিলাৰ উদাৰবন্দ বিধানসভাৰ ,মধুৰা গাঁও পঞ্চায়তৰ অন্তৰ্গত মধুপুৰ গাঁও ৷ 2019 বৰ্ষৰ 31 মাৰ্চৰ ভিতৰত সকলো গাঁৱতে বিদ্যুৎ সংযোগ হ'ব বুলি প্ৰধানমন্ত্ৰী মোডীয়ে মন্তব্য কৰিছিল যদিও আজি পৰ্যন্ত মধুপুৰ গাঁৱৰ প্ৰায় 70 টা পৰিয়ালে আন্ধাৰতে পাৰ কৰিছে প্ৰতিটো নিশা ৷
গাঁওবাসীৰ অভিযোগ অনুসৰি তেওঁলোকৰ গাঁৱখনত কেৱল বিদ্যুৎ সংযোগ নোহোৱাৰ সমস্যায়ে নহয় , আন বহু সমস্যাও তেওঁলোকৰ গাঁওখনক আৱৰি আছে ৷ গাঁওখনৰ বহু লোকে প্ৰধানমন্ত্ৰী আৱাস যোজনাৰ গৃহ লাভ কৰা নাই আৰু গাঁওখনত শৌচাগাৰ তথা পানীৰো কোনো সু-ব্যৱস্থা নাই বুলিও গাঁওবাসীয়ে অভিযোগ তুলে ৷ পানীৰ কোনো সু-ব্যৱস্থা নথকাৰ বাবে গাঁওবাসীয়ে প্ৰায় 2 কিলোমিটাৰ বাট অতিক্ৰম কৰি নদীৰ পৰা পানী আনিব লগীয়া হয় ৷ কিন্তু বাৰিষাৰ দিনত সেই নদীৰ পানী সেৱন কৰা বাবে বহু গাঁওবাসী ৰোগত আক্ৰান্ত হয় বুলি তেওঁলোকে জানিবলৈ দিয়ে ৷ সেয়ে ক্ষুব্ধ গাঁওবাসীয়ে ক্ষোভ উজাৰি কয় যে বৰ্তমানৰ বিধায়ক মিহিৰ কান্তি সোমে আজি লৈকে গাঁওখনৰ খবৰ লবলৈ আহৰি পোৱা নাই ৷ বিধায়কজনে নিৰ্বাচনৰ সময়ত দিয়া প্ৰতিশ্ৰুতিবোৰ আজি পৰ্যন্ত পূৰণ নোহোৱাৰো অভিযোগ গাঁওবাসীৰ ৷
