টুকৰগ্ৰাম, 28 ডিচেম্বৰ: ভাৰত-বাংলা সীমান্তৰ বিপদ সংকুল গাঁও টুকৰগ্ৰামত অসম বিপদ বন্ধু বাহিনীৰ উদ্যোগত শনিবাৰে মক্ ড্ৰীল কাৰ্যসূচী অনুষ্ঠিত কৰে ৷ উল্লেখ্য যে, কুশিয়াৰা নৈৰ পাৰৰ এই গাঁওখন বৰ্তমানেও এখন অনুন্নত গাঁও হিচাপে পৰিগণিত হৈ আহিছে ৷ স্থানীয় বাসিন্দা সকলে নদী পথেৰেই বৰ্তমানেও বিপদ সংকুল যাত্ৰা অব্যাহত ৰাখিছে এই গাঁৱত ৷
'বিপদ বন্ধু বাহিনীৰ' প্ৰশংসনীয় পদক্ষেপ
সেয়েহে অসম চৰকাৰৰ অগ্নি নিৰ্বাপক আৰু আপাতকালীন বিভাগৰ অধীনত বিপদ বন্ধু বাহিনীয়ে গাঁওবাসীৰ সজাগতাৰ প্ৰতি লক্ষ্য ৰাখি মক্ ড্ৰীল কাৰ্যসূচী অনুষ্ঠিত কৰে ৷ য'ত গাওঁবাসীক তেওঁলোকে আপাতকালীন অৱস্থাত গ্ৰহণ কৰিব পৰা কেতবোৰ পন্থাৰ বিষয়ে প্ৰশিক্ষণ প্ৰদান কৰে ৷ বিপদ বন্ধু বাহিনীৰ এই উল্লেখযোগ্য পদক্ষেপৰ প্ৰতি কৃতজ্ঞতা জ্ঞাপন কৰাৰ লগতে পুণৰ এনে অনুষ্ঠান আয়োজন কৰিবলৈ আহ্বান জনাইছে স্থানীয় ৰাইজে ৷
