বঙাইগাঁও, 9 এপ্ৰিলঃ বঙাইগাঁও জিলাৰ নাককাটি পাহাৰত ৰাইজৰ জালত পৰে তিনিজনকৈ অভিযুক্ত চোৰাং চিকাৰী । অভিযোগ অনুসৰি বঙাইগাঁও সদৰৰ সমীপৱৰ্তী ঐতিহাসিক নাককাটি , ভৈৰৱচূড়া আৰু ভূমেশ্বৰ পাহাৰত বৃদ্ধি পাইছে চোৰাং চিকাৰীৰ দৌৰাত্ম্য । শেহতীয়াকৈ পাহাৰখনত থকা শৰপহু, বন গাহৰি, বনৰৌ আদিকে ধৰি বিভিন্ন প্ৰাণী চোৰাং চিকাৰীৰ কবলত পৰিছে । চিকাৰীৰ দলে দৈনিক জাল, ধনুকাড়, ফাণ আদিৰে বিভিন্ন আপুৰুগীয়া প্ৰাণী হত্যা কৰি আহিছে ।
নাককাটি পাহাৰত ৰাইজে আটক কৰে তিনিজনকৈ অভিযুক্ত চোৰাং চিকাৰী
এনে অৱস্থাত বৃহস্পতিবাৰে নাককাটি পাহাৰৰ নামনিৰ দেৱাণগাঁৱৰ একাংশ লোকে, তিনিজন অভিযুক্তক আবদ্ধ কৰি বন বিভাগৰ হাতত গতাই দিয়ে । অভিযুক্ত তিনিজন ক্ৰমে খগৰপুৰৰ বাঘপাৰাৰ ইন্দ্ৰাচ চাংমা, প্ৰদীপ মাৰাক আৰু ইন্টাৰ মাৰাক বুলি জানিব পৰা গৈছে । সম্প্ৰতি আটকাধীন লোক তিনিজনক অভয়াপুৰী বন বিভাগৰ কাৰ্যালয়ত ৰখা হৈছে ।
