মাণিকপুৰ, 21 নৱেম্বৰ : মুখ্যমন্ত্ৰী হিমন্ত বিশ্ব শৰ্মাৰ কাঢ়া নিৰ্দেশকো কেৰেপ নকৰে একাংশ পঞ্চায়ত প্ৰতিনিধিয়ে । বঙাইগাঁও জিলাৰ মাণিকপুৰ উন্নয়ন খণ্ডৰ অন্তৰ্গত মাণিকপুৰ গাঁও পঞ্চায়তত অৰুণোদয় 2.0 আঁচনিৰ হিতাধিকাৰী বাচনিত ব্যাপক দুৰ্নীতি সংঘটিত হোৱাৰ অভিযোগ উত্থাপিত হৈছে ।
মঙলবাৰে বঙাইগাঁও জিলাৰ মাণিকপুৰ গাঁও পঞ্চায়তৰ অন্তৰ্গত অৰুণোদয় 2.o আঁচনিৰ পৰা বঞ্চিত লোকসকলে মাণিকপুৰ খণ্ড উন্নয়ন বিষয়াক এখন স্মাৰকপত্ৰ প্ৰদান কৰে ৷ উল্লেখযোগ্য যে পঞ্চায়তখনৰ একাংশ বিধৱা মহিলাৰ লগতে বিকলাংগ আৰু যোগ্য মহিলাক বঞ্চিত কৰি পঞ্চায়তখনৰ একাংশ ৱাৰ্ড সদস্যৰ পত্নীৰ নামত অৰুণোদয় 2.o আঁচনি অন্তৰ্ভুক্ত কৰাৰ গুৰুতৰ অভিযোগ উত্থাপন কৰিছে ভুক্তভোগী লোকসকলে ।
ইয়াৰ উপৰিও মাণিকপুৰ গাঁও পঞ্চায়তৰ অন্তৰ্গত হিতাধিকাৰীসকলে অৰুণোদয় 2.0 আঁচনিত আবেদন কৰাৰ নামত ৫০০-১০০ টকা দিব নোৱাৰিলে আচঁনিত অন্তৰ্ভুক্ত নহয় বুলি অভিযোগ উত্থাপন কৰে একাংশ বিধৱা মহিলা, বিকলাংগ মহিলাসকলে । ইয়াৰোপৰি অভিযোগকাৰীয়ে উল্লেখ কৰে যে কিছুদিন পূৰ্বে মাণিকপুৰ গাঁও পঞ্চায়তৰ অন্তৰ্গত গাঁওসমূহত প্ৰধানমন্ত্ৰী আবাস যোজনাৰ দুৰ্নীতিৰ অভিযোগত মাণিকপুৰ উন্নয়ন খণ্ডৰ খণ্ড উন্নয়ন বিষয়াক নিলম্বন কৰা হৈছিল । তথাপিও মাণিকপুৰ গাঁও পঞ্চায়তত দুৰ্নীতি বন্ধ হোৱা নাই বুলি অভিযোগ উত্থাপিত হৈছে ।
মঙলবাৰে খণ্ড উন্নয়ন বিষয়াই অভিযোগকাৰীসকলৰ আবেদনপ্ৰত্ৰ গ্ৰহণ কৰি বিহিত ব্যৱস্থা গ্ৰহণ কৰাৰ আশ্বাস প্ৰদান কৰে ৷ তেওঁ আশ্বাস দিয়ে যে অভিযোগকাৰী মহিলাসকলৰ যোগ্য়তা পৰীক্ষা কৰি পৰৱৰ্তী সময়ত অৰুণোদয় আঁচনিৰ অন্তৰ্ভুক্ত কৰোৱা হ’ব ৷ মুখ্যমন্ত্ৰী হিমন্ত বিশ্ব শৰ্মাই সততে কৈ থকা দুৰ্নীতিমুক্ত অসম গঢ়াৰ কথা ভেকোঁভাওনাত পৰিনত হৈছে নেকি ? সেয়া বৰ্তমান সময়ত লাখ টকীয়া প্ৰশ্ন ।
লগতে পঢ়ক : নলবাৰীত ৰেস্তোঁৰাত ঘোচ লৈ গ্ৰেপ্তাৰ জোখ-মাখ বিষয়া
