অভয়াপুৰী, 20 জুন : বঙাইগাঁও জিলাৰ ৩১ নং ৰাষ্ট্ৰীয় ঘাইপথৰ আই নৈৰ দলঙৰ ওপৰত এখন কন্টেইনাৰ ট্ৰাকে যাত্ৰীবাহী টাটা এচিই(TATA ACE) বাহনক মহতিয়াই নিয়ে ৷ দুৰ্ঘটনাটোত যাত্ৰীবাহী বাহনখনত থকা সাত জনকৈ লোক আহত হয় ৷ ইয়াৰে তিনিজনৰ অৱস্থা সংকটজনক বুলি জানিব পৰা গৈছে ৷
জানিব পৰা মতে, দলঙৰ ওপৰত থকা গাঁত এটাৰ ৰক্ষা পাবলৈ কন্টেইনাৰ ট্ৰাকে চাৰিচকীয়া যাত্ৰীবাহী বাহনখনক একে দিশৰ পৰা অহা বাহনখনক কিছু দূৰলৈ মহতিয়াই নিয়ে ৷ দুৰ্ঘটনাৰ পিছতে আৰক্ষী আৰু স্থানীয় লোকে আহত সকলক উদ্ধাৰ কৰি বঙাইগাঁৱৰ চিকিৎসালয়লৈ প্ৰেৰণ কৰে ৷ আহত আটাইকেইজন ব্যক্তি বিদ্যুৎ বিভাগৰ শ্ৰমিক বুলি জানিব পৰা গৈছে ৷
চাৰিলেনযুক্ত ৰাষ্ট্ৰীয় ঘাইপথ নিৰ্মাণৰ পিছতে টোলগেট বহুৱাই যান-বাহনৰ পৰা উচ্চ হাৰত কৰ আদায় কৰি আহিলেও ৰাষ্ট্ৰীয় ঘাইপথত মেৰামতিৰ অভাৱত ঠায়ে ঠায়ে বিপদজ্জনকভাৱে গাঁত সৃষ্টিৰ হোৱাৰ বাবেই এই দুৰ্ঘটনা সংঘটিত হোৱা বুলি স্থানীয় ৰাইজে জানিবলৈ দিয়ে ৷
লগতে পঢ়ক : ধংসৰ গৰাহত চামগুৰিৰ "বিল-পক্ষী নিৰীক্ষণ কেন্দ্ৰ"
