বঙাইগাঁও, 30 জুনঃ ৰাজ্যত নিবণুৱা সমস্য়াৰ জলন্ত উদাহাৰণ পোৱা গ'ল বঙাইগাঁৱত । জিলাখনৰ COVID চিকিৎসালয় এখনৰ বাবে 8 গৰাকী অস্থায়ী প্ৰাৰ্থী বিচাৰি আবেদন বিছৰা হৈছিল । সেই অনুসৰি মঙলবাৰে অনুষ্ঠিত হৈছিল সাক্ষাৎকাৰ । তিনি মাহৰ বাবে নিযুক্ত হ'ব লগীয়া 8টা পদত অৱৰ্তীৰ্ণ হ'ল প্ৰায় তিনি হাজাৰ গৰাকী প্ৰাৰ্থী ।
উল্লেখনীয় যে, ৰাজ্যত বৃদ্ধি পাই থকা COVID আক্ৰান্তৰ সংখ্যাৰ বাবে সকলোকে অধিক সতৰ্ক হ'বলৈ আহ্বান জনোৱাৰ সময়তে সাক্ষাৎকাৰ দিবলৈ অহা সময়ত যুৱক যুৱতী অধিকাংশৰে মাজত দেখা নাগ'ল সামাজিক দূৰত্ব । আনকি বহুতে মাস্ক পৰিধান নকৰাকৈয়ো দীঘলীয়া শাৰীত থিয় দি থকা দেখা পোৱা গ'ল ।
উল্লেখ্য যে, এই সাক্ষাৎকাৰ অনুষ্ঠিত হৈছিল বঙাইগাঁও জিলা যুটীয়া স্বাস্থ্য সঞ্চালকৰ কাৰ্যালয়ত ৷ পূৰ্বতে উপায়ুক্ত কাৰ্যালয়ত অনুষ্ঠিত হোৱাৰ কথা আছিল যদিও সাক্ষাৎকাৰৰ স্থান সোমবাৰে স্থানান্তৰিত কৰা হৈছিল ।
