বিশ্বনাথ,25 ছেপ্তেম্বৰ: বিশ্বনাথ চাৰিআলিত কিছুদিনৰ পৰা সংঘটিত হৈ আহিছিল অপৰাধমূলক কিছু কাৰ্য ৷ দিনৰ পোহৰতে একাংশ দুৰ্বৃত্তই যুৱতী-মহিলাক অশ্লীল ইংগিত প্ৰদান কৰাৰ দৰে ঘটনা সংঘটিত হোৱাৰ কথা পোহৰলৈ আহিছে ৷ দুৰ্বৃত্তকেইজনে একপ্ৰকাৰ টাৰ্গেট কৰি লৈছে যুৱতী-মহিলাসকলক ৷ কিন্তু শেহতীয়াকৈ তেনে এক দুৰ্বৃত্তক ধৰি উত্তম-মধ্যম শোধাই তিনিগৰাকী যুৱতীয়ে ৷
উল্লেখ্য যে,এনে ঘটনাৰ সন্মুখীন হোৱা একাংশই আকৌ ঘটনা সম্পৰ্কে ছ’চিয়েল মেডিয়া ফেচবুকত প্ৰচাৰৰ লগতে আৰক্ষী থানাতো এজাহাৰ দাখিল কৰিছিল ৷ কিন্তু ফলপ্ৰসূ নহ’ল কোনোটো উপায় ৷ বিশ্বনাথ চাৰিআলিৰ কলেজ ৰোডত প্ৰায়ে সংঘটিত হৈছিল এনে ঘটনা ৷ বিশ্বনাথ মহাবিদ্যালয়ৰ পৰা বিশ্বনাথ শিক্ষণ মহাবিদ্যালয়লৈ যোৱা পথটোৰ কমলাকান্ত ক্ষেত্ৰৰ সন্মুখভাগ মুঠেও সুৰক্ষিত নহয় মহিলা-যুৱতীৰ বাবে ৷ এই অভিযোগ দীৰ্ঘদিন পূৰ্বে উত্থাপন কৰিছিল বিশ্বনাথৰ সচেতন মহিলাসকলে ৷ অৱশেষত এই ঘটনাত অতিষ্ঠ হৈ মহাবিদ্যালয়লৈ অহা তিনিগৰাকী যুৱতীৱে ঐক্যবদ্ধ হৈ গুৰুলা-গুৰুলকৈ প্ৰহাৰ কৰে অশ্লীল ইংগিত প্ৰদান কৰা এগৰাকী ব্যক্তিক ৷ এই দৃশ্য ছ’চিয়েল মেডিয়াত ভাইৰেল হৈ পৰাৰ পিছতে ঘটনাটো পোহৰলৈ আহে ৷
