বিশ্বনাথ, 16 জুলাই : বিশ্বনাথত বুধবাৰে নিশাৰ ভাগত সংঘটিত হয় এক ভয়ংকৰ পথ দুৰ্ঘটনা ৷ বিশ্বনাথৰ প্ৰতাপগড়ত সংঘটিত হয় পথ দুৰ্ঘটনাটো । দুৰ্ঘটনাটোত থিতাতে দুজন লোক নিহত হোৱাৰ লগতে দুজন গুৰুতৰভাৱে আহত হয় ।
ঘটনা অনুসৰি, কেঁচা চাহপাত কঢ়িওৱা বলেৰ পিকআপ এখনে ৰৈ থকা বালি ভৰ্তি ট্ৰাক এখনৰ পিছফালে প্ৰচণ্ড বেগেৰে আহি খুন্দা মৰাত পথৰ বিপৰীত দিশত প্রায় ১০০ মিটাৰ দূৰত্বত চিটিকি পৰে বলেৰ পিকআপখন । যাৰ ফলত পিকআপখনত থকা দুজন লোক থিতাতে নিহত হয় আৰু গুৰুতৰভাৱে আহত হয় আন দুজন লোক ৷ আহত হোৱা লোকদুজনক বিশ্বনাথ মহকুমা অসামৰিক চিকিৎসালয়ত ভৰ্তি কৰোৱা হয় ।
নিহত লোকদুজন দুজন চতিয়াৰ বগলীবাৰী গাঁৱৰ মানস শইকীয়া আৰু জনৈক বীৰবল বুলি জানিব পৰা গৈছে ৷ আনহাতে আহত হোৱা লোকদুজন চতিয়াৰ পহুচোৱা গাঁৱৰ অমল দাস আৰু চতিয়া কৰতিগাঁৱৰ ধীৰেন বৰা বুলি জানিব পৰা গৈছে ৷ দুৰ্ঘটনাগ্ৰস্ত ট্ৰাকখনৰ পঞ্জীয়ন নম্বৰ AS 01 G 7385 আৰু বলেৰ পিকআপখনৰ পঞ্জীয়ন নম্বৰ AS 12 AC 9970 বুলি জানিব পৰা গৈছে ৷
লগতে পঢ়কঃ বঙাইগাঁৱত ভয়াৱহ অগ্নিকাণ্ড, দোকানসহ তিনিটা গৃহ ভষ্মীভূত
