বিশ্বনাথ, 5 জুলাই : সাধাৰণ মানুহক যে চৰকাৰ এখনে মাথোন ভোটবেংক হিচাপেহে ব্যৱহাৰ কৰে সেই কথা বাৰে বাৰে প্ৰমাণ হৈছে ৷ কুম্ভকৰ্ণ নিদ্ৰাত অসম চৰকাৰৰ জলসম্পদ বিভাগৰ বিষয়া কৰ্মচাৰী তথা গহপুৰ বিধানসভা সমষ্টিৰ বিধায়ক । বানে ধোৱা গহপুৰৰ এখন গাঁৱৰ ৰাইজে এটা ভগ্ন মথাউৰিৰ পৰা দীৰ্ঘদিন কৃষি কাৰ্য কৰিবলৈ সক্ষম হোৱা নাই ।
এই ভাগি থকা মথাউৰিটো নিৰ্মাণ কৰিবলৈ গাঁওখনৰ ৰাইজে দীৰ্ঘদিন ধৰি গহপুৰ বিধায়ক, জলসম্পদ বিভাগৰ বিষয়া কৰ্মচাৰী লগতে গাঁও পঞ্চায়তক অনুৰোধ জনাই জনাই কোনো সু-ফল নোপোৱাত শেষত বুধবাৰে গাঁওখনৰ ৰাইজেই নিজৰ গাঁঠিৰ ধন ভাঙি নিৰ্মাণ কৰিবলৈ হাতে হাত ধৰি আগবাঢ়ি আহিল ।
উল্লেখ্য যে গহপুৰ বিধান সভা সমষ্টিৰ পশ্চিম কলাবাৰী গাঁও পঞ্চায়তৰ মিকিৰ বৰাচুক আৰু আউনিবড়িৰ বিস্তৰ কৃষি ভূমিৰ মাজেৰে বৈ থকা মৰনৈৰ মথাউৰিটো কিছু দিন পূৰ্বে হোৱা বানৰ ফলত ছিগি গৈছিল । মথাউৰি তথা কৃষি বান্ধটো ছিগাৰ ফলত অঞ্চলটোৰ শ শ কৃষকৰ মাজত এক হাহাকাৰ পৰিস্থিতি সৃষ্টি হয় ।
ইফালে এই বান্ধটো ছিগাত অঞ্চলটোৰ ১০০ বিঘাৰো অধিক কৃষিভূমি পানীত বুৰ যায়। এই পানীৰ ফলত ৰাইজে শালি খেতি কৰাত অসুবিধাৰ সন্মুখীন হৈছিল । আনহাতে ৰাইজে গহপুৰৰ বিধায়ক তথা জলসম্পদ বিভাগৰ লগতে গাঁও পঞ্চায়তৰ কোনো সঁহাৰি নাপাই নিজেই ওলাই আহিল ভগ্ন মথাউৰিটো মেৰামতিৰ কৰিবলৈ ৷ প্ৰখৰ ৰ’দকো নেওচি শ্ৰমদানেৰে অঞ্চলটোৰ ৰাইজে মথাউৰিটো মেৰামতি কৰিছে যদিও ভৰ বাৰিষাক লৈ শংকিত হৈ পৰিছে গাঁওবাসী । আনহাতে উক্ত মথাউৰি পুনৰ মেৰামতি কৰিবলৈ ৰাইজে স্থানীয় বিধায়ক উৎপল বৰাক আহ্বান জনাইছে ।
লগতে পঢ়ক : Protest in Gohpur: গহপুৰত এটা পথ নিৰ্মাণক কেন্দ্ৰ কৰি প্ৰতিবাদ
