বিশ্বনাথ, ১৭ অক্টোবৰ : অসম চৰকাৰে ৰাজ্যখনৰ মাইক্ৰ’ফাইনান্স খণ্ডৰ ঋণী সকলে সম্মুখীন হোৱা অসুবিধাৰ প্ৰতি লক্ষ্য ৰাখি অসম মাইক্ৰ’ফাইনান্স উদগনি আৰু সকাহ আঁচনি, ২০২১ ৰ অধীনত আৰ্থিক সকাহ প্ৰদান কৰি আহিছে । এই সকাহ আঁচনিৰ তৃতীয় শ্ৰেণীৰ (CATEGORY - III) অধীনত বিশ্বনাথ জিলাতো সোমবাৰে ঋণ গ্ৰহণকাৰীক ঋণমুক্ত প্ৰমাণ পত্ৰ আনুষ্ঠানিকভাৱে বিতৰণ কৰে ।
বিশ্বনাথ চাৰিআলিৰ আৱৰ্ত ভৱনৰ সমীপৰ খেলপথাৰত অনুষ্ঠিত হোৱা এখন ৰাজহুৱা সভাত হিতাধিকাৰীসকলৰ মাজৰে পাঁচগৰাকীক ঋণ মুক্ত প্ৰমাণ পত্ৰ প্ৰদান কৰি এই বিতৰণ প্ৰক্ৰিয়াৰ আনুষ্ঠানিকভাৱে শুভাৰম্ভ কৰে অসম চৰকাৰৰ হস্ততাঁত বস্ত্ৰ শিল্প, ৰেচম আৰু ভূমি সংৰক্ষণ বিভাগৰ মন্ত্ৰী উৰ্খাও গৌৰা ব্ৰহ্মই । তেজপুৰ লোকসভা সমষ্টিৰ সাংসদ পল্লৱলোচন দাস, গহপুৰ বিধানসভা সমষ্টিৰ বিধায়ক উৎপল বৰা, বিশ্বনাথ বিধানসভা সমষ্টিৰ বিধায়ক প্ৰমোদ বৰঠাকুৰ প্ৰমুখ্যে গণ্যমান্য ব্যক্তিসকলৰ উপস্থিতি থাকে ৷
এই অনুষ্ঠানত মুখ্য অতিথি হিচাপে উপস্থিত থাকি মন্ত্ৰী উৰ্খাও গৌৰা ব্ৰহ্মই কয়, ‘‘এই তৃতীয় পর্যায়ত চৰকাৰে ২৫,০০০ টকালৈকে ঋণ লোৱা সকলক অগ্ৰাধিকাৰ দিছে । চৰকাৰে ২৫,০০০ ৰ পৰা ৫০,০০০ টকালৈকে ঋণগ্ৰহণকাৰীসকলকো এই সুবিধা প্ৰদানৰ কথা সক্ৰিয়ভাৱে বিবেচনা কৰি আছে ৷ যাৰ ফলত তেওঁলোক পুনৰবাৰ ঋণ লোৱাৰ বাবে যোগ্য হৈ উঠিব’’ ।
মন্ত্ৰীগৰাকীয়ে জিলাখনৰ সকলো মাইক্ৰ’ফাইনান্স ঋণ গ্ৰহণকাৰীক তেওঁলোকৰ বকেয়া ঋণসমূহ সময় মতে পৰিশোধ কৰিবলৈ আহ্বান জনায় ৷ প্ৰতিষ্ঠানসমূহে যিদৰে প্ৰয়োজনৰ সময়ত আইমাতৃসকলক ঋণ প্ৰদান কৰি সহায় কৰিছে, তেওঁলোকৰো ঋণ পৰিশোধ কৰি সহায় কৰাটো সকলোৰে দায়িত্ব বুলি তেওঁ উল্লেখ কৰে ।
উল্লেখযোগ্য যে, বিশ্বনাথ জিলাখনত এই আঁচনিৰ অধীনত মুঠ ২৭১৩ গৰাকী হিতাধিকাৰী উপকৃত হ'ব । অসম মাইক্ৰ’ফাইনান্স উদগনি আৰু সকাহ আঁচনি, ২০২১ ৰ দ্বিতীয় পৰ্যায়ৰ অধীনত বিশ্বনাথ জিলাত মুঠ ১২,৫৯০ গৰাকী প্ৰথম শ্ৰেণীৰ হিতাধিকাৰী উপকৃত হৈছে । সেইদৰে জিলাখনত দ্বিতীয় শ্ৰেণীৰ ৩০৯৯ গৰাকী হিতাধিকাৰীও উপকৃত হৈছিল ।
এই অনুষ্ঠানটিত তেজপুৰ লোকসভা সমষ্টিৰ সাংসদ পল্লৱলোচন দাস, বিশ্বনাথ সমষ্টিৰ বিধায়ক প্ৰমোদ বৰঠাকুৰ আৰু গহপুৰ সমষ্টিৰ বিধায়ক উৎপল বৰাই ভাষণ প্ৰদান কৰে ৷ লগতে তেওঁলোকে মাইক্ৰ’ফাইনান্স প্ৰতিষ্ঠানৰ পৰা ঋণ গ্ৰহণ কৰি বিভিন্ন কাৰণত সমস্যাৰ সন্মুখীন হোৱা ৰাজ্যখনৰ মহিলাসকলৰ বাবে বৰ্তমান চৰকাৰখনে এই অভিলাসী আঁচনি গ্ৰহণ কৰিছে বুলিও উল্লেখ কৰে ৷
ভাস্কৰজ্যোতি বৰাই আঁতধৰা এই অনুষ্ঠানত জিলাখনৰ কেইবাহাজাৰ মহিলা হিতাধিকাৰী উপস্থিত থাকে ৷ এই অনুষ্ঠানত বিশ্বনাথৰ জিলা আয়ুক্ত ডাঃ নেহা যাদৱে আদৰণি ভাষণ প্ৰদান কৰে । অনুষ্ঠানটিত বিশ্বনাথ চাৰিআলি পৌৰ সভাৰ পৌৰপতি অমৰজ্যোতি বৰঠাকুৰ, বিশ্বনাথ জিলা পৰিষদৰ সভানেত্ৰী লাবণ্য চাৰেঙীয়া উপস্থিত থাকে ৷
লগতে পিচপৰা জাতি পৰিষদৰ উপাধ্যক্ষ ডাঃ ৰঞ্জন গগৈ, সমাজকৰ্মী পংকজ বৰা, দিগন্ত ঘাটোৱাৰ, আৰক্ষী অধীক্ষক শুভাশীষ বৰুৱা, অতিৰিক্ত জিলা আয়ুক্ত ধ্ৰুৱজ্যোতি দাস, অতিৰিক্ত জিলা আয়ুক্ত তথা গহপুৰ মহকুমাৰ ভাৰপ্ৰাপ্ত মহকুমাধিপতি লুকুমণি বৰা আদিৰ লগতে বিভিন্ন বিভাগৰ মুৰব্বী বিষয়া আৰু জিলা প্ৰশাসনৰ কৰ্মচাৰীসকলো উপস্থিত থাকে ৷
