গহপুৰ,৩ ছেপ্টেম্বৰ : বছৰত দুটাকৈ ভয়ংকৰ বানে জুৰুলা কৰা কৃষকসকল এইবাৰ আন এক সংকটত পৰিছে (Assam farmers crisis)। বানৰ বাবে খেতি কৰাত পলম হোৱাৰ পাছত এইবাৰ কৃষকৰ পথাৰত নাই পানী । যাৰ বাবে শালিধানৰ পথাৰত ঠায়ে ঠায়ে মেলিছে ছিৰাল ফাঁট (Draught condition in Assam)।
অসমৰ প্ৰায়বোৰ খেতিয়কেই একে সমস্যাৰ সন্মুখীন হৈছে । খেতিৰ ওপৰতে নিৰ্ভৰশীল কৃষকসকলে এতিয়া ভৱিষ্যতৰ কথা চিন্তা কৰি মূৰে-কপালে হাত দিছে ।
একেই পৰিৱেশ বিশ্বনাথ জিলাৰ গহপুৰত । খৰাং বতৰৰ বাবে চিন্তিত হৈ পৰিছে গহপুৰৰ হেলেমৰ সাধাৰণ কৃষকসকল । পথাৰত এতিয়া এটুপি পানী নাই । যোৱা দুটাকৈ বানে অঞ্চলটোৰ বহু খেতি পথাৰ নষ্ট কৰিছে ।
বালিয়ে পুতি পেলাইছে বহু পথাৰ । তাৰ মাজতে কোনো মতে কৃষকসকলে বছৰৰ খেতি কৰিছিল যদিও এতিয়া খৰাং বতৰে কৃষকৰ আশাত চেঁচাপানী ঢালিছে । খৰাং বতৰৰ বাবে হেলেম ৰাজহ চক্ৰ অধীনৰ আমলখি দলনি, লেপেটা পাৰা, গমিৰিকে আদি কৰি বহু অঞ্চলৰ কৃষক প্ৰভাৱিত হোৱা দেখা গৈছে (Water crisis in paddy field)।
