বিহপুৰীয়া,5 মাৰ্চ: বিধানসভা নিৰ্বাচনলৈ মাজত মাথো এটা মাহ বাকী ৷ এই সময়খিনিতে এতিয়া ৰাজ্যৰ বিভিন্ন প্ৰান্তত আৰম্ভ হৈছে বিজেপিৰ প্ৰাৰ্থীত্ব কেন্দ্ৰীক সংঘাত ৷ ৰাজ্যৰ বিভিন্ন স্থানৰ সমান্তৰালকৈ বিহপুৰীয়া সমষ্টিটো আৰম্ভ হৈছে বিজেপিৰ প্ৰাৰ্থীত্ব কেন্দ্ৰীক সংঘাত ৷ সংঘাতৰ পৰিণতিত এতিয়া দুই মেৰুত অৱস্থান কৰিছে বিহপুৰীয়াৰ দুই বিজেপি শিবিৰে ৷ এফালে যদি টিকট বঞ্চিতৰ প্ৰতিবাদ আনফালে আকৌ প্ৰাৰ্থীত্ব লাভত উৎফুল্লিত একাংশ দলীয় কৰ্মী ৷ সমষ্টিটোৰ বিধায়ক দেৱানন্দ হাজৰিকাক প্ৰাৰ্থীত্ব প্ৰদানৰ দাবী জনাই একাংশই প্ৰতিবাদ সাব্যস্ত কৰাৰ বিপৰীতে অমিয় কুমাৰ ভূঞাৰ প্ৰাৰ্থীত্ব লাভত উৎফুল্লিত হৈ পৰিছে একাংশ দলীয় সমৰ্থক ৷
উল্লেখ্য যে, সমষ্টিটোৰ নাৰায়ণপুৰস্থিত বিজেপি দলৰ কাৰ্যালয়ৰ সমুখত শুকুৰবাৰে দিনৰ ভাগত দুই গোটে প্ৰদৰ্শন কৰে যুদ্ধংদেহী মূৰ্তি ৷ একাংশৰ মুখত দেবানন্দ হাজৰিকা জিন্দাবাদ আন একাংশৰ মুখত অমিয় ভূঞা জিন্দাবাদ ধ্বণি ৷ আনফালে দেবানন্দ হাজৰিকাৰ সমৰ্থকে তলা মাৰি বন্ধ কৰি দিলে নাৰায়ণপুৰ বিজেপিৰ কাৰ্যালয় বাজপেয়ী ভৱন ৷ ঘটনাক লৈ অসহায় হৈ পৰিছে বিজেপিৰ হাইকামাণ্ড ৷
