বিশ্বনাথ, 13 জুলাই : বিশ্বনাথ জিলাৰ উপায়ুক্তৰ অফিচিয়েল ফেচবুক পেজ(official facebook page)টো ক্লন(clone) কৰি এইবাৰ ৰাইজক দুৰ্বৃত্তই ধন বিচাৰি আবেদন কৰাৰ খবৰে ৰাজ্যজুৰি চাঞ্চল্যৰ সৃষ্টি কৰিছে । ইতিমধ্যে সামাজিক মাধ্যম(social media)ত এই পেজ(page)টো পৰিচালনা কৰা কৰ্তৃপক্ষই বিষয়টো সদৰী কৰিছে । দুৰ্বৃত্তই কৌশলপূৰ্ণভাৱে চৰকাৰী নীতি নিৰ্দেশনা ঘোষণা কৰা এই ফেচবুক পেজটোৰ পৰা বহুসংখ্যকে ধন বিচাৰি অনুৰোধ প্ৰেৰণ কৰিছে ।
প্ৰথম অৱস্থাত এই ঘটনাই সকলোকে স্তম্ভিত কৰিলেও বিশ্বনাথ জিলা প্ৰশাসনে(Bishwanath district administration) সমগ্ৰ ঘটনাটো ৰাইজৰ দৃষ্টিগোচৰ কৰে ৷ এই সন্দৰ্ভত জিলা প্ৰশাসনে স্পষ্ট কৰি দিয়ে যে, উপায়ুক্তৰ অফিছিয়েল পেজ(official page of DC)টো ক্লন কৰিহে অজ্ঞাত হেকাৰে(hacker) ধন বিচাৰি এনে আইনবিৰোধী কাৰ্যত লিপ্ত হৈছে । এই সংক্ৰান্তত ইতিমধ্যে বিশ্বনাথ চাৰিআলি আৰক্ষী থানাত জিলা প্ৰশাসনে এক অভিযোগো দাখিল কৰিছে ৷
সমগ্ৰ ৰাজ্যতে এতিয়া এটা চক্ৰই প্ৰশাসনিক বিষয়া, জনপ্ৰিয় তাৰকা, প্ৰভাৱশালী ৰাইজনৈতিক নেতাৰ সামাজিক মাধ্যমৰ একাউন্ট(social media account) হেক(hack) কৰি লোক সকলৰ ভাৱমূৰ্তি ম্লান কৰা কাৰ্যত লিপ্ত হোৱা পৰিলক্ষিত হৈছে ৷ শেহতীয়াকৈ, ৰাজ্যৰ গৃহ সচিব(home secretary) দিগন্ত বৰাৰ নামতো কোনো দুষ্ট চক্ৰই নকল একাউন্ট খোলাৰ কথাও বিষয়া গৰাকীয়ে সামাজিক মাধ্যম যোগে নিজেই অৱগত কৰিছিল ৷
লগতে পঢ়ক : ভুল চিকিৎসাৰ অভিযোগ : পুনৰ বিতৰ্কত ডাঃ ছফিকুল ইছলাম
