বৰপেটা, ৮ জানুৱাৰী: ৰাজ্যত অব্যাহত আছে চোৰ-ডকাইতৰ আদি ঘটনা । ইয়াৰ বিৰুদ্ধে আৰক্ষী প্ৰশাসনে কঠোৰ দৃষ্টি ৰাখি আহিছে যদিও নিয়ন্ত্ৰণ কৰিব পৰা নাই চোৰ-ডকাইতৰ ঘটনা । বৰপেটা জিলাৰ সৰ্থেবাৰী আৰক্ষী থানাৰ অন্তৰ্গত গৰেমাৰী গাঁৱতো সংঘটিত হয় তেনে এক ঘটনা । গৰেমাৰী গাঁৱৰ পৰা এখন মেজিক বাহনসহ এটা চোৰক আটক কৰিবলৈ সক্ষম হয় মাজদিয়া আৰক্ষীয়ে ।
ঘটনা অনুসৰি, AS 25 AC 4965 নম্বৰৰ এখন যাত্ৰীবাহী মেজিক গাদেশালী গাঁৱৰ পৰা দুটাকৈ গভাইত চোৰে লৈ উধাও হোৱাৰ সময়তে স্থানীয় লোকে গৰেমাৰীত বাহনসহ চোৰক আৱদ্ধ কৰি ৰাখে যদিও ঘটনাস্থলীৰ পৰা আন এটা চোৰ পলাই যাবলৈ সক্ষম হয় ।
ইফালে চুৰি বাহনসহ আৱদ্ধ কৰি ৰখা চোৰটোৰ বিষয়ে মাজদিয়া আৰক্ষী চকীৰ ভাৰপ্ৰাপ্ত আৰক্ষী চকীত খবৰ দিয়ে স্থানীয় ৰাইজে । ঘটনাৰ খবৰ লাভ কৰা মাত্ৰকে মাজদিয়া আৰক্ষী চকীৰ ভাৰপ্ৰাপ্ত আৰক্ষী বিষয়া পবিত্ৰ কলিতাই ঘটনাস্থলীত উপস্থিত হৈ চোৰটোক আটক কৰাৰ লগতে চুৰি বাহনখন জব্দ কৰি আৰক্ষী চকীলৈ লৈ যায় । মেজিক বাহনখনৰ গৰাকীয়ে ইতিমধ্যে মাজদিয়া আৰক্ষী চকীত এক এজাহাৰ দাখিল কৰিছে ।
ধৃত চোৰটো গাদেশালী গাঁৱৰ চানোৱাৰ হক বুলি জানিব পৰা গৈছে ।
লগতে পঢ়ক: গুৱাহাটীত গ্ৰেপ্তাৰ 7 গভাইত চোৰ
