বৰপেটা, 4 নৱেম্বৰ : ইহ সংসাৰৰ পৰা বিদায় মাগিলে সত্ৰনগৰী বৰপেটাৰ বিশিষ্ট সত্ৰীয়া শিল্পী তথা সংগীত নাটক অকাডেমী বঁটা(Sahitya Akademi Award)প্ৰাপক জগন্নাথ বায়ন(Jagannath Bayan)য়ে ৷ বুধবাৰে নিশা প্ৰায় 8 বাজি 20 মিনিটত মৃত্যু হয় বিশিষ্ট সত্ৰীয়া শিল্পীগৰাকীৰ ৷ মৃত্যুৰ সময়ত তেওঁৰ বয়স আছিল 96 বছৰ ৷
অসমৰ পৰম্পৰাগত খোল-বাদ্যলৈ আগবঢ়োৱা জীৱনজোৰা অৱদানৰ স্বীকৃতিস্বৰূপে সংগীত নাটক অকাডেমীয়ে 2017 বৰ্ষৰ অকাডেমী বঁটা আগবঢ়াইছিল বিশিষ্ট শিল্পীগৰাকীক৷ দীৰ্ঘদিন ধৰি বাৰ্ধক্যজনিত ৰোগত শয্যাশায়ী হৈ আছিল সত্ৰীয়া শিল্পীগৰাকী ৷ 1925 চনৰ 3 মে’ত সত্ৰনগৰী বৰপেটাৰ কুজীৰদ’ হাটীৰ এটা সত্ৰীয়া সাংস্কৃতিক পৰিয়ালত জন্মগ্ৰহণ কৰিছিল জগন্নাথ বায়নে ৷
বৰপেটা সত্ৰৰ মুখ্য বায়ন জগন্নাথ বায়নে অসম চৰকাৰৰ শিল্পী পেঞ্চন, গোকুল পাঠক বঁটা, বৰপেটা শিৰোমণি বঁটা আৰু সত্ৰভূষণ উপাধিও লাভ কৰিছিল ৷ বৰপেটা সত্ৰৰ দৈনন্দিন সেৱায়িত কাৰ্যৰ সৈতে জড়িত জগন্নাথ বায়নে খোলটোকেই সংগী হিচাপে গ্ৰহণ কৰি সত্ৰনগৰী বৰপেটাৰ পৰা আৰম্ভ কৰিছিল বিশ্বমুখী যাত্ৰা ৷
বৰপেটা সত্ৰ(Barpeta Satra)ৰ সত্ৰীয়া পৰম্পৰাক জীয়াই ৰখাৰ কামত ব্ৰতী হৈ অহা শিল্পীগৰাকীয়ে গুৰুজনাৰ সত্ৰীয়া সংস্কৃতিৰ প্ৰচাৰ আৰু প্ৰসাৰতে ওৰেটো জীৱন উচৰ্গা কৰি আহিছিল ৷ বৃহস্পতিবাৰে পুৱাৰ ভাগত বৰপেটা চহৰৰ নখান্দা নৈৰ তীৰৰ শ্মশানত অন্ত্যেষ্টিক্ৰিয়া সম্পন্ন কৰা হ’ব শিল্পীগৰাকীৰ ৷ শিল্পীগৰাকী মৃত্যুৰ বাতৰিয়ে শোকাকুল কৰি তুলিছে সত্ৰনগৰী বৰপেটা ৷
লগতে পঢ়ক : পুতলা থিয়েটাৰ পুনৰুজ্জীৱিত কৰাৰ প্ৰয়াস এটি শিল্পী দম্পতীৰ
