দলগাঁও, 28 জুলাই : মঙলবাৰে দৰঙৰ খাৰুপেটীয়াত সংঘটিত হয় এক ভয়াবহ পথ দুৰ্ঘটনা । পথ দুৰ্ঘটনাত থিতাতে এজন বাইক আৰোহী নিহত হোৱাৰ লগতে গুৰুতৰ ভাৱে আহত হয় আন এজন লোক । জানিব পৰা মতে তেজপুৰ অভিমুখে ভাৰতীয় সেনা বাহিনীৰ কনভয় গৈ থকাৰ অৱস্থাত বিপৰীত দিশৰ পৰা অহা AS-10 AW 6520 নম্বৰৰ পালচাৰ বাইকখনৰ লগত মুখামুখি সংঘৰ্ষ হয় । ঘটনাটো সংঘটিত হয় 15 নং ৰাষ্ট্ৰীয় ঘাইপথৰ বালুগাঁৱত ।
দৰঙৰ খাৰুপেটীয়াত ভয়াবহ পথ দুৰ্ঘটনা
নিহত যুৱকজন খেতাশ্বৰ গাওঁৰ মুছা আলী আৰু আহত যুৱক জন খেতাশ্বৰ গাওঁৰ ফকিৰ আলী বুলি জানিব পৰা গৈছে । ঘটনা সংঘটিত হোৱাৰ লগে লগে স্থানীয় ৰাইজে পৰিস্থিতি উত্তপ্ত কৰি তোলে । খবৰ পাই খাৰুপেটীয়া আৰক্ষী দল ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে । ইফালে গুৰুতৰ ভাৱে আহত যুৱক জনক ততাতৈয়াকৈ চিকিৎসালয়লৈ প্ৰেৰণ কৰা হয় ।
