বৰপেটাৰোড , 6 ডিচেম্বৰঃ সৰভোগৰ ভূলুকাডোবাৰ দশম শ্ৰেণীত অধ্যয়নৰত কৌশিক ৰাজবংশী (১৭) নামৰ কিশোৰজনক দুৰ্বৃত্তই হত্যা কৰাৰ 15 দিন অতিক্ৰম কৰাৰ পাছতো সৰভোগ আৰক্ষীয়ে অপৰাধীক কৰায়ত্ত কৰিব নোৱাৰাৰ প্ৰতিবাদত শুকুৰবাৰে স্থানীয় ৰাইজে ঘেৰাও কৰে সৰভোগ আৰক্ষী থানা ৷ বৰনগৰ অঞ্চলৰ মহিলা সকলে আৰক্ষী থানা ঘেৰাও কৰি কৌশিক ৰাজবংশীৰ হত্যাকাৰীক কৰায়ত্ত কৰক, আৰক্ষী মুৰ্দাবাদ আদি শ্লোগান দি উত্তাল কৰি তোলে সৰভোগ আৰক্ষী থানাৰ চৌহদ ৷
প্ৰতিবাদকাৰী ৰাইজৰ অভিযোগ , সৰভোগৰ ভিন্ন প্ৰান্তত সঘনাই হত্যা লুণ্ঠণ আদি ঘটনা সংঘটিত হৈ আহিছে যদিও আৰক্ষীয়ে সেই অপৰাধী সকলক কৰায়ত্ত কৰিবলৈ সক্ষম হোৱা নাই ৷ সৰভোগ আৰক্ষীয়ে কেৱল মদ আৰু জুৱাৰ আড্ডাৰ পৰা ধন সংগ্ৰহতেই ব্যস্ত থাকে বুলি ভয়ংকৰ অভিযোগ উত্থাপন কৰে প্ৰতিবাদকাৰীসকলে ৷ উল্লেখযোগ্য যে , 31 নম্বৰ ৰাষ্ট্ৰীয় ঘাইপথৰ ভূলুকাডোবা দলঙৰ সমীপত বহু কেইটা হত্যাৰ ঘটনা সংঘটিত হৈছে যদিও কোনো এটা ঘটনাৰে কোনো এজন অপৰাধীকেই আজিলৈকে আৰক্ষীয়ে আটক কৰিবলৈ সক্ষম হোৱা নাই ৷ যোৱা 21 নৱেম্বৰ তাৰিখে উক্ত দলঙৰ কাষতে কৌশিক ৰাজবংশীকো দুৰ্বৃত্তই নিৰ্মমভাৱে হত্যা কৰি পেলাই থৈ গৈছিল ৷ অতি শীঘ্ৰে ঘটনাটোৰ তদন্ত কৰি দোষীক কৰায়ত্ত কৰিবলৈ আৰক্ষী প্ৰশাসনক দাবী জনাইছে কিশোৰজনৰ পৰিয়ালৰ লোকৰ লগতে স্থানীয় ৰাইজে ৷
