বৰপেটা, 21 আগষ্টঃ শুকুৰবাৰে বৰপেটা জিলাৰ হাউলীত উপস্থিত হয় মন্ত্ৰী পীযুষ হাজৰিকা ৷ হাউলীত উপস্থিত হৈ বিদ্যৎ বিভাগৰ উপ কেন্দ্ৰ এটা উদ্বোধন কৰাৰ লগতে হাউলী পৌৰ এলেকাৰ ৰাজহুৱা পুখুৰীৰ সৌন্দৰ্যবৰ্ধন আৰু উন্নীতকৰণ কামৰো শুভাৰম্ভ মন্ত্ৰীগৰাকীয়ে ৷ উক্ত অনুষ্ঠানত কংগ্ৰেছ এআইইউডিএফৰ মিত্ৰতা সন্দৰ্ভত মন্তব্য কৰি মন্ত্ৰী গৰাকীয়ে কয় যে, বদৰুদ্দিন আজমলৰ নেতৃত্বত বা ৰিম'ট কন্ট্ৰলত কংগ্ৰেছ চৰকাৰ গঠন হ’লে বা বদৰুদ্দিন আজমল মুখ্যমন্ত্ৰী হ’লে অসমীয়াৰহে ক্ষতি হ’ব ৷ কিছুবছৰ পূৰ্বে বদৰুদ্দিন আজমলক সমালোচনাৰে থকাসৰকা কৰা তৰুণ গগৈয়ে এতিয়া তেখেতৰ লগতে মিত্ৰতা কৰিব ওলাইছে ৷ তৰুণ গগৈ ডাঙৰীয়াই একো এৰিব নোখোজে ৷ ৯০ বছৰ বয়সতো তেওঁ মুখ্যমন্ত্ৰী হ’ব খোজে ৷ তাৰ পিছত নিজ পুত্ৰকো মুখ্যমন্ত্ৰী পাতিব খোজে বুলি তৰুণ গগৈক তীব্ৰ সমালোচনা কৰে মন্ত্ৰী পীযুষ হাজৰিকাই ৷
আগন্তুক বিধানসভা নিৰ্বাচনতো বিজিপিয়ে চৰকাৰ গঠন কৰিব বুলি মন্তব্য কৰি মন্ত্ৰী পীযুষ হাজৰিকাই কয় যে, খিলঞ্জীয়া আৰু অসমীয়াৰ অস্তিত্বৰ বাবে তেওঁলোকে সদায় মাত মাতি যাব ৷ ৬ নং দফাৰ প্ৰতিবেদন দুবছৰ ভিতৰত ৰূপায়নৰ বাবে বিজেপি চৰকাৰ বদ্ধপৰিকৰ ৷ বিজেপিৰ বাহিৰে আন চৰকাৰে 6 নং অনুসূচীক লৈ কমিটি গঠন কৰা নছিল ৷ কেৱল মাত্ৰ খিলঞ্জীয়াৰ প্ৰতি থকা দায়িত্বৰ বাবেই বিজেপি চৰকাৰে এই অনুসূচীক লৈ কাম কৰিছে বুলি কয় মন্ত্ৰীগৰাকীয়ে ৷
লগতে পঢ়ক-আছুৰ নতুন ৰাজনৈতিক দল: কি কয় দুই প্ৰাক্তন সভাপতিয়ে
