জনীয়া, 29 জুন : বৰপেটা জিলাৰ (Barpeta District) কলগাছিয়াত বেঁকী নৈ (Beki River)ৰ ভয়ংকৰ গৰাখহনীয়া ৷ গৰাখহনীয়াৰ কৱলত উচন হ'ল শতাধিক পৰিয়ালৰ ঘৰ-বাৰীৰ লগতে হাজাৰ বাজাৰ বিঘা কৃষি ভূমি । খাদ্য,বস্ত্ৰ আৰু বাসস্থানৰ অভাৱত অনিদ্ৰা অনাহাৰে মুকলি পথাৰতে নিশা কটাবলগীয়া হৈছে খহনীয়াগ্ৰস্ত ৰাইজে । কলগাছিয়া ৰাজহচক্ৰৰ অন্তৰ্গত চতলা গাঁও, কাউৰজাহী, বলাইপাথাৰ কেইখন মানাহ আৰু বেকী নৈৰ ভয়ংকৰ খহনীয়াৰ কবলত পৰি প্ৰায় নিশ্চিহ্ন হোৱাৰ পথত ।
উল্লেখযোগ্য যে, বাৰিষাৰ প্ৰাকক্ষণতেই কলগাছিয়া ৰাজহ চক্ৰৰ অন্তৰ্গত চতলা গাঁও কাউৰজাহী, বলাইপাথাৰ আদি গাঁৱত বেকী নদীয়ে গৰাখহনীয়াৰ ভয়ংকৰ তাণ্ডৱ চলোৱাত ইছপ বজাৰৰ নামনিত দুদিন পূৰ্বে পোন্ধৰ টাকৈ পৰিয়ালৰ ঘৰ-দুৱাৰ নদীৰ বুকুত উছন গৈছে । ইয়াৰ লগতে নদীৰ পাৰে পাৰে প্ৰায় বিশ লাখ টকা ব্যয় সাপেক্ষে নিৰ্মাণ হোৱা ৰিং বান্ধখনো ভাগি যোৱাত বলাইপাথাৰ হৈ খাৰবাল্লীলৈ নদীৰ এটা নতুন সূতি ওলাই যোৱাৰ ফলত ন ন অঞ্চললৈ নদীৰ তীব্ৰ ভাবুকিৰ সৃষ্ট হৈছে ।
বিভাগীয় কৰ্তৃপক্ষই খহনীয়া প্ৰতিৰোধৰ কোনো ব্যৱস্থা গ্ৰহণ নকৰাত ৰাইজে উপায়ন্তৰ হৈ ঘৰে ঘৰে বাহ সংগ্ৰহ কৰি পকেটৰ ধন খৰচ কৰি পৰ্কুপাইন নিৰ্মাণৰ কাম হাতত লয় । পাছলৈ স্থানীয় বিধায়ক ড৹ হাফিজ ৰফিকুল ইছলামে (MLA Dr. Hafish Rafikul Islam) বিধায়ক পুঁজিৰ পৰা আৰ্থিক সহায় কৰিব বুলি ঘোষণা কৰিছে । সাংসদ (MP) আব্দুল খালেকৰ দৃষ্টি আকৰ্ষণ কৰিছে ৰাইজে । লগতে অঞ্চলটোত নদীৰ গৰাখহনীয়া স্থায়ীভাৱে প্ৰতিৰোধ কৰিবলৈ ৰাইজে জল সম্পদ বিভাগলৈ দাবী উত্থাপন কৰিছে ।
বিগত ছমাহ ধৰি গাঁওখনৰ শতাধিক পৰিয়ালৰ ঘৰ-দুৱাৰ নৈৰ বুকুত জাহ যোৱাৰ লগতে শ শ বিঘা কৃষিভূমি ধ্বংস কৰিছে নৈৰ গৰাখহনীয়াই ৷ বেকী নৈৰ (Beki River) গৰাখহনীয়াত সৰ্বশ্ৰান্ত শতাধিক পৰিয়ালে ভেটি-মাটি হেৰুৱাই সৰ্বশ্ৰান্ত হৈছে । বিগত বছৰৰ বানপানীৰ পাচৰ পৰাই অঞ্চলটোত নিৰবিচ্ছিন্নভাৱে গৰাখহনীয়াই ধ্বংসলীলা চলাই আহিছে যদিও জনপ্ৰতিনিধি তথা জিলা প্ৰশাসনৰ নীৰৱ ভূমিকাত ক্ষুব্ধ হৈ পৰিছে ভুক্তভোগী লোকসকল । কুম্ভকৰ্ণ নিদ্ৰাত থকা জিলা প্ৰসাশনক শীঘ্ৰে গৰাখহনীয়া প্ৰতিৰোধ (Erosion Protection) কৰিবলৈ দাবী জনাইছে স্থানীয় ৰাইজে ।
