জনীয়া, 23 মে': ক্ৰমাৎ কমি আহিছে ভয়াৱহ ৰূপ ধাৰণ কৰা বেঁকী নৈৰ জলপৃষ্ঠ ৷ কিন্তু জলপৃষ্ঠ কমিলেও নৈপৰিয়া ৰাইজৰ মাজত কমা নাই আতংক ৷ এতিয়াও আতংকৰ মাজতে সময় পাৰ কৰিছে বৰপেটা জিলাৰ কলগাছিয়া ৰাজহ চক্ৰৰ অন্তৰ্গত প্ৰায় কুৰিখন গাঁৱৰ ৰাইজে ৷ এতিয়াও জলমগ্ন নৈ পৰীয়া বিস্তীৰ্ণ অঞ্চল ৷
উল্লেখ্য যে, ভূটানৰ কুৰিশ্ব বান্ধৰ পানী এৰি দিয়াৰ ফলত শুকুৰবাৰে বেঁকী নৈৰ জলপৃষ্ঠ বৃদ্ধি হৈ জলমগ্ন হৈছিল বৰপেটা জিলাৰ কলগাছিয়া ৰাজহ চক্ৰৰ অন্তৰ্গত প্ৰায় কুৰিখন গাঁও ৷ হঠাৎ অহা বানত বেঁকী নৈৰ চৰৰ মাজতে বহু লোক আবদ্ধ হোৱাৰ লগতে পানীত ডুব গৈছিল বহু কৃষকৰ ইৰি ধান, মৰাপাট আৰু শাক-পাচলিৰ খেতি ৷ এই বানৰ কৱলত পৰিছিল কলগাছিয়া ৰাজহ চক্ৰৰ অন্তৰ্গত গুইলেজা, মিনিশিমলা, শ্ৰীৰামপুৰ, লাচাংগা, বলাইপথাৰ, খাৰবাল্লী, ডাউকমাৰি, সুতিৰপাথৰ আদি কুৰিখন গাঁওৰ বিস্তীৰণ অঞ্চল ৷ ইয়াৰ পাছতো হৈ থকা নেৰা-নেপেৰা বৰষুণৰ ফলত অধিক আতংকিত হৈ পৰিছিল উক্ত অঞ্চল সমূহৰ ৰাইজ ৷ কিন্তু শুকুৰবাৰৰ ৰাতিৰ ভাগৰ পৰা ক্ৰমাৎ কমিছে বেঁকী নৈৰ জলপৃষ্ঠ ৷ উপায়ন্তৰ ৰাইজে এতিয়া চৰকাৰলৈ জনাইছে সহায়ৰ আহ্বান ৷
লগতে পঢ়কঃ নেমকেয়াৰৰ ঘটনাৰ পাচত অধিক সতৰ্ক হৈছে ব্যক্তিগত খণ্ডৰ চিকিৎসালয়
