সাংসদ মাতৃৰ বিৰুদ্ধে এন আৰ চিৰ আপত্তি

মাতৃক লগত লৈ এন আৰ চিৰ শুনানি কেন্দ্ৰত উপস্থিত হ'ল বৰপেটাৰ নৱ-নিৰ্বাচিত সাংসদ আব্দুল খালেক ৷ সাংসদগৰাকীৰ মাতৃৰ বিৰুদ্ধে দাখিল এন আৰ চিৰ আপত্তি ৷

বৰপেটা, ২৭ মে': বৰপেটাৰ নৱ-নিৰ্বাচিত সাংসদ আব্দুল খালেকৰ মাতৃৰ বিৰুদ্ধে দাখিল এন আৰ চিৰ আপত্তি ৷ জনীয়াৰ হৃদয়ৰঞ্জন নাথ নামৰ এগৰাকী লোকে কংগ্ৰেছী বিধায়ক তথা বৰপেটাৰ নৱ-নিৰ্বাচিত কংগ্ৰেছ সাংসদ আব্দুল খালেকৰ মাতৃৰ বিৰুদ্ধে এন আৰ চি কৰ্তৃপক্ষৰ ওচৰত দাখিল কৰিছে এই আপত্তি পত্ৰ ৷ এই অভিযোগৰ ভিত্তিতে সোমবাৰে বৰপেটাৰোডৰ ভগৱানী দেৱী প্ৰসূতি সদনৰ এন আৰ চিৰ শুনানি কেন্দ্ৰত উপস্থিত হৈ নিজৰ নাগৰিকত্বৰ তথ্য দাখিল কৰিলে সাংসদগৰাকীৰ বৃদ্ধ মাতৃয়ে ৷ ১৯৫১ চনৰ এন আৰ চিৰ লগতে ১৯৭০ চনৰ ভোটাৰ তালিকা নাম সন্নিৱিষ্ট থকা সাংসদগৰাকীৰ মাতৃৰ বিৰুদ্ধে এন আৰ চিৰ আপত্তি দাখিল হোৱাত আশ্চৰ্য প্ৰকাশ সাংসদগৰাকীৰ ৷

এন আৰ চিৰ শুনানিত উপস্থিত হৈ বৰপেটাৰ ৰাজীৱ ভৱনত সংবাদমেল অনুষ্ঠিত কৰি সাংসদগৰাকীয়ে ক'লে, শুদ্ধ এন আৰ চি নিবিচৰা এচাম লোকে এনেদৰেই কৰি এন আৰ চি নামত হাৰাশাস্তি কৰি গৈছে ৷ ইপিনে বদৰুদ্দিন আজমলে দেওবাৰে সাংসদগৰাকীৰ সম্পৰ্কত কৰা মন্তব্যৰ প্ৰতিক্ৰিয়া ব্যক্ত কৰি হিমন্ত বিশ্বই বৰপেটাত প্ৰচাৰ চলালে অগপ প্ৰাৰ্থী কুমাৰ দীপক দাসৰ ভোট ৫০ হাজাৰ বৃদ্ধি পালেহেতেন বুলি কয় নৱ-নিৰ্বাচিত সাংসদগৰাকীয়ে ৷