কেলেংকাৰী: ছাত্ৰৰ বিপৰীতে ৮০ বছৰীয়া বৃদ্ধাই লাভ কৰিলে ছাত্ৰবৃত্তি

ভাৰত চৰকাৰৰ সংখ্যালঘু পৰিক্ৰমা মন্ত্ৰণালয়ে আগবঢ়োৱা বৃত্তিগত আৰু কাৰিকৰী শিক্ষাৰ জলপানিৰ নামত বৰপেটাত বৃহৎ কেলেংকাৰী ৷ ৮০ বছৰীয়া বৃদ্ধ, নিৰক্ষৰ মহিলা, দিন-হাজিৰা কৰা শ্ৰমিক, শিক্ষকৰ নামত আহিছে ছাত্ৰবৃত্তিৰ ধন ৷ আনকি সহজ-সৰল গঞাক আঁভূৱা ভাৰি দুষ্টচক্ৰই উলিয়াই নিছে ছাত্ৰ বৃত্তিৰ নামত অহা কোটি কোটি টকা ৷ এই অভিযোগ বৰপেটাৰ একাংশ লোকৰ ৷

বৰপেটা, 21 জুলাই : দুৰ্নীতিমুক্ত অসম গঢ়াৰ শ্ল’গান দি থকা চৰকাৰৰ দিনতে পুনৰ এক কেলেংকাৰীৰ তথ্য পোহৰলৈ আহিছে ৷ এই কেলেংকাৰী সংঘটিত হৈছে ছাত্ৰবৃত্তিৰ নামত ৷ এই তথ্য পোহৰলৈ আনিছে বৰপেটাৰ চেঙা সমষ্টিৰ কেইবাখনো গাঁৱৰ ৰাইজে ৷

ছাত্ৰবৃত্তিৰ নামত এইবাৰ ধন আহিছে ৮০ বছৰীয়া বৃদ্ধ, নিৰক্ষৰ মহিলা, দিন-হাজিৰা কৰা শ্ৰমিক, শিক্ষক, গৃহিণী আদিলৈ ৷ চেঙা সমষ্টিৰ ভৈৰাগুৰি, কাঁহিকুছি, বাগুদি আদি গাঁৱসমূহত হুমায়ুন মালিক আৰু হান্নান আলীৰ নেতৃত্বত দেশৰ বিভিন্ন কাৰিকৰী শিক্ষা প্ৰতিষ্ঠানত অধ্যয়ন কৰি থকা ছাত্ৰ-ছাত্ৰীৰ ভূৱা নথি দাখিল কৰি দালাল চক্ৰই উলিয়াই নিছে ছাত্ৰবৃত্তিৰ কোটি কোটি টকা ৷ এই অভিযোগ কৰিছে চেঙাৰ কিছু সচেতন মহলে ৷ আনকি বাদ পৰি যোৱা নাই শিক্ষকো ৷

জানিব পৰা মতে, স্থানীয় কেইবাখনো বিদ্যালয়, মাদ্ৰাছা আদিৰ নামত দুষ্ট চক্ৰটোৱে একো একোজন ছাত্ৰৰ নামতো উলিয়াই নিছে জলপানিৰ ৩০ হাজাৰকৈ টকা ৷ সহজ-সৰল ৰাইজক এম জি এনৰেগাৰ ধন সোমোৱা বুলি আঁভূৱা ভাৰি দুষ্ট চক্ৰটোৱে উলিয়াই নিছে সমগ্ৰ ধন ৷ এই কথা অকপটে স্বীকাৰ কৰিছে ছাত্ৰবৃত্তিৰ নামত অহা ধনৰ গৰাকীয়ে ৷

উল্লেখ্য যে, সংখ্যালঘু সম্প্ৰদায়ৰ আৰু কাৰিকৰী শিক্ষা (Merit Cum Means Scholarship for Professional and Technical Course) আঁচনিৰ জৰিয়তে ভাৰত চৰকাৰে আগবঢ়াই এই জলপানি ৷ সংখ্যালঘুসকলৰ বাবে মেধা তথা উপায় আধাৰিত বৃত্তি আঁচনি হৈছে সংখ্যালঘু পৰিক্ৰমা মন্ত্ৰণালয়ৰ এক মুখ্য কাৰ্যসূচী । ই এক কেন্দ্ৰীয় খণ্ডৰ আঁচনি আৰু সংখ্যালঘু পৰিক্ৰমা মন্ত্ৰণালয়ৰ দ্বাৰা 100% পুঁজি যোগান ধৰা হয় ।

সংখ্যালঘুসকলৰ বাবে মেধা তথা উপায় বৃত্তি আঁচনিৰ উদ্দেশ্য হৈছে সংখ্যালঘু সম্প্ৰদায়ৰ পৰিয়ালৰ শিশুসকলক সমৰ্থন প্ৰদান কৰা । দেশৰ বিভিন্ন কাৰিকৰী শিক্ষা প্ৰতিষ্ঠান তথা বিভিন্ন শিক্ষা প্ৰতিষ্ঠানত শিক্ষা গ্ৰহন কৰি থকা অসমৰ সংখ্যালঘু সম্প্ৰদায়ৰ ছাত্ৰ-ছাত্ৰীসকলক বেংক একাউন্টৰ জৰিয়তে সংখ্যা লঘু মন্ত্ৰণালয়ে আগবঢ়াই এই জলপানিৰ ধন ৷ এতিয়া তাতো চকু পৰিছে দুষ্ট চক্ৰৰ ৷ আশ্বৰ্যকৰভাৱে যিসকল লোকৰ বেংক একাউণ্টযোগে কাৰিকৰী শিক্ষাৰ জলপানিৰ ধন উলিয়াই নিছে, সেইসকলৰ অধিকাংশৰেই বয়স ৫০ বছৰৰ ওপৰৰ ৷

তাৰোপৰি বহুতেই আকৌ নিজৰ চহীটোকে কৰিব নোৱাৰে ৷ অথচ তেনে লোকৰ নামতেই উলিয়াই নিছে কোটি কোটি টকা ৷ আনহাতে, এনে কেলেংকাৰী সৈতে জড়িত হৈ পৰাৰ পিছত গঞা ৰাইজৰ মাজতো সৃষ্টি হৈছে আতংকৰ ৷ চৰকাৰে এই কেলেংকাৰীৰ বিৰুদ্ধে উচিত তদন্ত কৰাৰ লগতে দোষীক উচিত শাস্তি প্ৰদান কৰিবলৈ দাবী জনাইছে গাঁৱবাসীয়ে ৷

লগতে পঢ়ক: কেঁচা চাহপাতৰ মূল্য হ্ৰাসে বিপদত পেলাইছে ক্ষুদ্ৰ চাহ খেতিয়কক