বৰপেটা ৯ এপ্ৰিল: বৰপেটা জিলাৰ মাজদিয়া আৰক্ষীৰ জালত পৰিছে এটা কিশোৰী অপহৰণকাৰী । ধৃত অপহৰণকাৰীটো দৰং জিলাৰ ধূলা আৰক্ষী থানাৰ অন্তৰ্গত ৰাণী পুখুৰীৰ চাদ্দাম আলী(২০) বুলি জানিব পৰা গৈছে । ধৃত চাদ্দাম আলীৰ বিৰুদ্ধে অপহৃত কিশোৰীগৰাকীৰ পৰিয়ালৰ লোকে মাজদিয়া আৰক্ষী চকীত অপহৰণৰ গোচৰ ৰুজু কৰে ।
সৰ্থেবাৰী আৰক্ষী থানাত ১২৩/২০২১ নম্বৰত পঞ্জীয়ণ হোৱা গোচৰৰ ভিত্তিত মাজদিয়া আৰক্ষী চকীৰ ভাৰপ্ৰাপ্ত আৰক্ষী বিষয়া প্ৰণৱ কুমাৰ দাসৰ তৎপৰতাত সহঃউপ পৰিদৰ্শক পবিত্ৰ কলিতাৰ নেতৃত্বত যোৱা এটি আৰক্ষীৰ দলে কিশোৰী অপহৰণৰ অভিযোগত চাদ্দাম আলীক দৰং জিলাৰ ৰাণী পুখুৰীৰ পৰা বৃহস্পতিবাৰে নিশা আটক কৰে । লগতে অপহৃত কিশোৰীগৰাকীকো উদ্ধাৰ কৰে ।
১৫ বছৰীয়া অপহৃত কিশোৰীগৰাকী সপ্তম শ্ৰেণীৰ ছাত্ৰী বুলি জানিব পৰা গৈছে । শুকুৰবাৰে চাদ্দাম আলীক বৰপেটা আদালতত হাজিৰ কৰায় বুলি জানিবলৈ দিয়ে মাজদিয়া আৰক্ষী চকীৰ ভাৰপ্ৰাপ্ত আৰক্ষী বিষয়া প্ৰণৱ কুমাৰ দাসে ।
লগতে পঢ়ক: শনিবাৰৰ পৰা বকোত ৰাভা হাছং উশ্বু প্ৰতিযোগিতা
