কলগাছিয়া, 19 আগষ্ট : ৰাজ্য চৰকাৰে সম্প্ৰতি নতুনকৈ ক’ভিড নিৰ্দেশনা জাৰি কৰি ব্যক্তিগত যান-বাহনসমূহক আন্তঃজিলা যাতায়ত কৰাৰ অনুমতি প্ৰদান কৰিছে । কিন্তু ৰাজহুৱা খণ্ডৰ যান বাহনসমূহৰ আন্তঃজিলা যাতায়ত ক্ষেত্ৰত থকা নিষেধাজ্ঞা অব্যাহত ৰাখিছে প্ৰশাসনে ৷ যাৰ বাবে এতিয়া একাংশ চালক তথা মালিকৰ পানীত হাঁহ নচৰা অৱস্থা হৈছে ।
প্ৰশাসনৰ এই নিষেধাজ্ঞাৰ পাছতো ৰাজ্যৰ কিন্তু আন একাংশ মালিক তথা চালকে অনায়াসে তিনিখনকৈ জিলা অতিক্ৰম কৰি এইদৰে আন্তঃজিলা যাতায়ত অব্যাহত ৰাখিছে । বৃহস্পতিবাৰে পুৱা বৰপেটাৰ ২ নং বিকল্প ৰাজ্যিক ঘাইপথৰ বামুনটাৰী বজাৰত একাংশ মালিক আৰু চালকে মিলি চৰকাৰৰ নীতি নিৰ্দেশনাক বুঢ়া আঙুলি দেখুৱাই আন্তঃজিলা যাতায়ত অব্যাহত ৰখা ট্ৰেভেলাৰ আৰু বাছ-গাড়ীক আটক কৰাত অঞ্চলটোত এক উত্তেজনাময় পৰিবেশৰ সৃষ্টি হয় ।
চৰকাৰৰ আন্তঃজিলা যাতায়তৰ ক্ষেত্ৰত কঠোৰ নিৰ্দেশৰ পিছত কাক কাক মেনেজ কৰি এইদৰে গুৱাহাটীৰ পৰা ধুবুৰীলৈ, ধুবুৰীৰ পৰা গুৱাহাটীলৈ গাড়ী চলাবলৈ সাহস কৰিলে সেয়া এই মুহূৰ্তত এক ডাঙৰ প্ৰশ্ন ।
লগতে পঢ়ক : য়ামনে নৈৰ পাৰত উদ্ধাৰ জোনাইৰ যুৱকৰ মৃতদেহ
