বৰপেটা, 21 জুন : জীৱশ্ৰেষ্ঠ মানৱৰ হাতত বিপদাপন্ন হৈছে মৎস্যকূল ৷ এচাম লোকৰ হাতত বাছি যোৱা নাই ক্ষুদ্ৰ পোনা মাছবোৰো ৷ দহ অথবা কুৰি টকা অৰ্জন অথবা লোভৰ বশৱৰ্তী হৈ মাছৰ সৰু পোনাবোৰ ধৰিছে এছাম লোকে ৷ যাৰফলত ৰাজ্যৰ থলুৱা মৎস্যক্ষেত্ৰলৈ দূৰ্যোগ নামি অহাৰ লগতে মহলদাৰসকলো বৃহৎ ক্ষতিৰ সন্মুখীন হ'বলগীয়া হৈছে ৷
বৰপেটা জিলাৰ নখান্দা, পল্লা, কালদিয়া আদি নৈসমূহৰ দুয়োপাৰে ঢেঁকী জাল অথবা আন জাল পাতি মাছ ধৰিছে নৈপৰীয়া লোকসকলে ৷ মীন আইনক অংগুষ্ঠ দেখুৱাই জাল পাতি ধৰিছে পোনা মাছবোৰ ৷ ৰাজ্যত প্ৰচলিত মীন আইন অনুসৰি, 15 এপ্ৰিলৰ পৰা 15 জুলাইলৈ 14 চেন্টিমিটাৰতকৈ কম বৰ্গৰ বেৰজাল, মহাজাল, ফাঁচিজাল বা অন্য যিকোনো প্ৰকাৰৰ জালেৰে জলাশয় বা মীনমহলত মাছ ধৰা নিষেধ ৷ এই সময়ছোৱা মাছৰ প্ৰজননৰ সময় বাবে থলুৱা প্ৰজাতিৰ ৰৌ, বাহু, মিৰিকা, চিতল, কলীয়াজৰা, কুঁহি, বৰালি আদি গাভিনী মাছ ধৰা নিষিদ্ধ ৷ ইয়াৰোপৰি, 31 অক্টোবৰ পৰ্যন্ত 10 চেন্টিমিটাৰ পৰ্যন্ত দৈৰ্ঘৰ মাছবোৰ ধৰা অথবা খোৱা আইন বিৰুদ্ধ ৷ কিন্তু, মাছে কণী পাৰি পোৱালি জগোৱাৰ এই সময়ত নৈসমূহত অবৈধ মাছমৰীয়াসকল ব্যস্ত হৈ পৰিছে পোনা মাছ, গাভিনী মাছ ধৰি দুপইচা অৰ্জন কৰাত ৷
ইয়াৰ মাজতেই বৰপেটা জিলা মীন বিভাগে আৰক্ষী আৰু মহলদাৰৰ সহযোগত বৰপেটা আৰু সৰুক্ষেত্ৰী সমষ্টিৰ নৈসমূহত মীন আইন ভংগ কৰা লোকসকলৰ বিৰুদ্ধে আৰম্ভ কৰিছে অভিযান ৷ এই অভিযানতে আৰক্ষীয়ে জব্দ কৰে বহুকেইখন জাল ৷ আনহাতে, আন একাংশক মীন আইন ভংগ নকৰিবলৈ সকীয়নি প্ৰদান কৰে মীন বিভাগে ৷ মীন আইনৰ প্ৰতি ৰাইজৰ মাজত সজাগতা সৃষ্টিৰ প্ৰয়াসেৰে নৈপৰীয়া ঠাইসমূহত মীন বিভাগে পোষ্টাৰিং কাৰ্যসূচীও গ্ৰহন কৰে ৷ উল্লেখ্য যে, মীন আইন ভংগ কৰিলে 6 মাহলৈ জেল হ'ব পাৰে বুলিও সদৰি কৰে মীন বিষয়াই ৷ মীন আইন ভংগৰ বিৰুদ্ধে বিভাগটোৱে আৰম্ভ কৰা এই অভিযান অব্যাহত থাকিব বুলিও সদৰি কৰে মীন বিষয়াগৰাকীয়ে ৷
আৰু পঢ়ক : ষষ্ঠ আন্তৰাষ্ট্ৰীয় যোগ দিৱস : দেশবাসীক সম্বোধন প্ৰধানমন্ত্ৰী মোডীৰ
