বৰপেটা,17 মে: যি সময়ত একাংশ লোকে বন্যপ্ৰাণী নিধন তথা বনাঞ্চল ধ্বংস কৰি চোৰাং বেহা চলাই আহিছে তেনে সময়তে বহু লোকে বন্যপ্ৰাণীৰ সুৰক্ষা আৰু সংৰক্ষণত সহযোগিতা আগবঢ়াই আহিছে ৷ ৰাজ্যখনত বিবিধ বন্যপ্ৰাণীৰ লগতে বিশেষকৈ কেকোসাপৰ বৃহৎ চোৰাং ব্যৱসায় চলি থকাৰ লগতে বিভিন্ন সময়ত কেকোসাপৰ চোৰাং বেহাৰ সৈতে জৰিত বহু লোক আৰক্ষীৰ হাতত আটক হৈছে ৷ বন্য জীৱ-জন্তুৰ আন্তৰাষ্ট্ৰীয় চোৰাং বজাৰত এডাল কেকোসাপৰ মূল্য কেইবালক্ষাধিক টকা হোৱাৰ সময়তে বৰপেটাত উদ্ধাৰ হৈছে কেকোসাপ ৷
দেওবাৰে বৰপেটাৰ জ্যোতি নগৰৰ শৈলেন দাস নামৰ লোকজনৰ ঘৰত আশ্ৰয় লৈ থকা এডাল কেকোসাপ উদ্ধাৰ কৰে লোকজনে ৷ সাপডাল উদ্ধাৰ কৰি বন বিভাগক চমজাই দিয়ে লোকজনে ৷ শৈলেন দাসৰ ঘৰত কেবাদিন ধৰি আশ্ৰয় লৈ থকা কেকোসাপডাল বন বিভাগৰ লোকে উদ্ধাৰ কৰি মানাহ ৰাষ্ট্ৰীয় উদ্যানত মুকলি কৰি দিয়ে ৷ চোৰাং ব্যৱসায়ী অথবা অসাধু লোকৰ পৰা ৰক্ষা কৰাৰ উদ্দেশ্যেৰে তথা বন্যপ্ৰাণী সুৰক্ষাৰ বাবে শৈলেন দাসৰ পৰিয়ালটোৱে লোৱা ভূমিকাৰ বাবে শলাগ লৈছে বৰপেটাৰ খণ্ড বন বিষয়া বনজিৎ দাসে ৷
