এটা ছাগলীৰ বাবে চিকিৎসালয়ত ভৰ্তি হ’ল ছজন

গ্ৰামাঞ্চলত কাৰোবাৰ বাৰীত আনৰ গৰু-ছাগলী সোমোৱাটো কোনো নতুন কথা নহয় ৷ আপোনাৰ বাৰীত বাৰু কেতিয়াবা আনৰ গৰু-ছাগলী সোমাই পাইছেনে ? যদি সোমাই তেতিয়াহলে আপুনি বাৰু কি কৰে ? এনে এক কথাকে লৈ কালগাছিয়াৰ এখন গাঁৱত সংঘটিত হৈছে ভয়াৱহ ঘটনা ৷

বৰপেটা,10 আগষ্ট : বৰপেটা জিলাৰ কলগাছিয়া আৰক্ষী থানাৰ অন্তৰ্গত লাংলাত সোমবাৰে সন্ধিয়া এটা ছাগলীক কেন্দ্ৰ কৰি সৃষ্টি হয় উত্তপ্ত পৰিস্থিতিৰ ৷ এটা ছাগলীয়ে ধান খেতি অনিষ্ট কৰাক কেন্দ্ৰ কৰি দুটা ফৈদৰ মাজত সংঘটিত হয় প্ৰচণ্ড মাৰপিট ৷ এই ঘটনাত গুৰুতৰভাৱে আহত হয় একেটা পৰিয়ালৰ ছজনকৈ লোক ৷

প্ৰাপ্ত খবৰ মতে, অঞ্চলটোৰ ছাইদুল ইছলামৰ ছাগলীয়ে কেইবাদিন ধৰি চুবুৰীয়া জামাল উদ্দীনৰ ধান খেতি খাই অনিষ্ট কৰিছিল ৷ এই সন্দৰ্ভত জামাল উদ্দীনে চুবুৰীয়া ছাইদুল ইছলামক বহুবাৰ অভিযোগো কৰিছিল ৷ কিন্তু ইমানৰ পাছতো বিষয়টোৰ সন্দৰ্ভত কোনো গুৰুত্ব দিয়া নাছিল ছাইদুল ইছলামে ৷ যাৰ বাবে অতিষ্ঠ হৈ সোমবাৰে ছাইদুল ইছলামৰ ছাগলীটো ধৰি আনি ঘৰত বান্ধি ৰাখিছিল জামাল উদ্দীনে ৷

লগতে পঢ়কঃ সময়ৰ সোঁতত বিলীন হ’ব নেকি মনোমতীৰ জন্মস্থান ?

ইয়াৰ পিচতে ছাইদুল ইছলাম ছাগলী নিবলৈ আহি জামাল উদ্দীনৰ ঘৰত উপস্থিত হৈ তীব্ৰ বাক-বিতণ্ডাত লিপ্ত হয় ৷ ঘটনাক লৈ পৰৱৰ্তী সময়ত সংঘটিত হয় প্ৰচণ্ড মাৰপিটৰ ঘটনা ৷

ছাইদুল ইছলামৰ নেতৃত্বত ইউচুফ আলি, আব্দুল হাই, মহিবুৰ ৰহমান, আমজাদ হুছেইন, আব্দুছ ছালাম আৰু ছলেমান আলীয়ে জামাল উদ্দীনৰ ঘৰত দলবদ্ধ আক্ৰমণ কৰে ৷ লগতে ভাঙি লণ্ড-ভণ্ড কৰে বৃদ্ধ জামাল উদ্দীনৰ ঘৰৰ আচবাব ৷ দলটোৰ নিৰ্মম প্ৰহাৰত গুৰুতৰভাৱে আহত হয় জামাল উদ্দীনসহ পৰিয়ালৰ ছজনকৈ লোক ৷

ঘটনা সংঘটিত হোৱাৰ পাছতে গুৰুতৰ ভাৱে আঘাতপ্ৰাপ্ত সকলক ততাতৈয়াকৈ চেনিমাৰী ক্ষুদ্ৰ প্ৰাথমিক চিকিৎসালয়ত ভৰ্ত্তি কৰোৱা হয় ৷ ইয়াৰে বৃদ্ধ জামাল উদ্দীনৰ অৱস্থা অতি সংকটজনক হোৱাৰ বাবে পৰৱৰ্তী সময়ত তেওঁক উন্নত চিকিৎসাৰ বাবে কলগাছিয়াস্থিত বৰপেটা অসামৰিক চিকিৎসালয়লৈ প্ৰেৰণ কৰা হয় ৷

বৰ্তমান চিকিৎসায়ত মৃত্যুৰে যুঁজিছে বৃদ্ধ গৰাকীয়ে ৷ এই ঘটনাই এতিয়া সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে ৷ ঘটনাৰ উচিত তদন্ত কৰি দোষীক যথোপযুক্ত শাস্তি প্ৰদান কৰাৰ দাবী উত্থাপন কৰিছে স্থানীয় ৰাইজৰ লগতে ভুক্তভোগী পৰিয়ালে ৷

লগতে পঢ়কঃ বানৰ কোবাল সোঁত আৰু ১০ টকীয়া বাজি...