কলগাছিয়াৰ শওপুৰত বেকী নৈৰ তাণ্ডৱ

কলগাছিয়াৰ শওপুৰত বেকী নৈৰ তাণ্ডৱ । খহনীয়াত জাহ গল বেকী দলঙৰ গাইড বান্ধৰ লগতে চাৰিটা পৰিয়ালৰ মাটি-ভেটি আৰু বাসগৃহ । গৌতম কনষ্ট্ৰাকচন নামৰ কোম্পানীটোৱে আঁচনি মতে গাইড বান্ধ নিৰ্মাণ নকৰাৰ অভিযোগ স্থানীয় ৰাইজৰ ৷

জনীয়া,9আগষ্ট : সংহাৰী বানৰ পিছত এতিয়া জনীয়া সমষ্টিৰ কলগাছিয়াৰ শওপুৰত আৰম্ভ হৈছে বেকী নৈৰ তীব্ৰ গৰাখহনীয়া ৷ বৃহস্পতিবাৰৰ সন্ধিয়াৰ পৰাই অঞ্চলটোত গৰাখহনীয়াই চলাইছে তাণ্ডৱ ৷ খহনীয়াত জাহ যায় বেকী দলঙৰ গাইড বান্ধৰ লগতে হাছমত আলী, ছাত্তাৰ আলী, লালচান আলী আৰু ফুলচান আলীৰ মাটি-ভেটিৰ লগতে বাসগৃহ ৷ এই খহনীয়াৰ বাবে এতিয়া আতংকিত হৈ উঠিছে অঞ্চলবাসী ৷ প্ৰায় দুই শতাধিক পৰিয়াললৈ খহনীয়াই কঢ়িয়াই আনিছে ভাবুকি ৷

উল্লেখ্য যে, মাত্ৰ ৫ মাহ পূৰ্বে বেকী নৈৰ দলঙৰ পূব ফালে জীও বেগ আৰু বালিৰে নিৰ্মাণ কৰা হৈছিল দলঙৰ গাইড বান্ধ ৷ গৌতম কনষ্ট্ৰাকচন নামৰ ঠিকদাৰে নিম্ন মানৰ কাম কৰাৰ বাবেই এই গাইড বান্ধটো বেঁকী নৈত জাহ গৈছে বুলি ৰাইজে অভিযোগ উত্থাপন কৰে ৷ বিভাগীয় অভিযন্তাই দলঙৰ গাইড বান্ধ নিৰ্মান কৰা ঠিকাদাৰৰ লগত ধনৰ লেন-দেন কৰি নিম্নমানৰ কাম কৰিছে বুলিও একাংশই মন্তব্য কৰে ৷